Ógæfumenn

 

„Að sjálfsögðu fer ég þangað í heimsókn. Þar er mitt blóð, mitt fólk og býr við ömurlegar aðstæður. Eftir að Júgóslavía liðaðist í sundur hefur endurreisn samfélags engan veginn heppnast. Fáir eru vel stæðir, aðrir komast með naumindum af, og allt of margir lifa við hungurmörk. Og deyja þar. Atvinnuleysisbætur eru greiddar í nokkrar vikur og eftir það er fólki hent út á guð og gaddinn. Almennatryggingar eru nánast engar, þú ert bjargarlaus ef eitthvað bjátar á. Þau nágrannalönd okkar sem gengið hafa í Evrópusambandið eru ekki mikið betur sett. Þangað hafa að vísu komið nokkur vestur-evrópsk stórfyrirtæki til þess eins að fá til starfa verkafólk á lágmarkslaunum og skilja ekki mikið eftir í löndunum. Stjórnvöld ljúga átölulaust að fólkinu og komast upp með það vegna þess að fjölmiðlar eru máttlausir. Og það stefnir í það sama víða í Vestur-Evrópu: Atvinuleysi, fátækt, lýðræði hinna ríku sem falsa tölur, stela úr almannasjóðum og rýra rétt borgaranna. Og þeim hefur víða tekist að drepa vonina. Þetta eru nöturlegir tímar,“ sagði Króati sem flúði til Spánar eftir borgarastyrjöld í landi sínu.

Ef grannt er skoðað eru svipaðir hlutir að gerast hér hjá okkur. Hinir ríkari verða ríkari, sjúkrahúsin og almannatryggingakerfið er látið grotna niður, atvinnuleysisbótatímabil er stytt, aðgangur að menntun er takmarkaður, ráðherrar flengjast með stofnanir, starfsfólk þeirra og fjölskyldur landshornanna á milli og vegið er að fjölmiðlum.

Eitt af því sem tefur fyrir ógæfumönnunum sem stjóra Íslandi þess dagana er Ríkisútvarpið. Þeir fá engan frið til þess að svindla og ráðskast með okkur vegna þeirrar fréttamennsku sem þar er stunduð. Það er sífellt verið að koma upp um þá: Lygar þeirra og leka, leynibrugg þeirra um flutning ríkisstofnanna, gjafir þeirra á eigum okkar til skyldmenna sinna, til útgerðar og banka og nú síðast frændhyglina hjá Vegagerðinni. Af þessum sökum og mörgum öðrum ætla þeir að svelta útvarpið í hel. Með því styrkja þeir aðstöðu sína til gjörræðis, veikja von fólksins um réttlátt samfélag, jafnvel deyða hana. Okkur er stjórnað af ógæfumönnum.