Og sjá: Þér munið uppskera!

 

Eins og sagði í pistli hér á Herðubreið, sem skrifaður var fyrir tveimur sólarhringum, hafa atvinnurekendur gefið tóninn fyrir komandi kjaraviðræður með fulltingi stjórnvalda. Þeir hafa tekið upp slagorðið: Minna er meira. Sem útleggst, að því minni launahækkanir sem verkalýðurinn fær þeim mun meira beri hann úr býtum.

Útgerðarfélagið Vísir í Grindavík yfirgaf þrjár verstöðvar úti á landi til þess að auka á gróða sinn, skildi fólk, sem ekki vildi flytja með þeim, eftir atvinnulaust, en því sem vildi fylgja þeim í brallinu buðu þeir í háhýsi á heimaslóð útgerðarinnar. Þeir eru væntanlega gengnir í Verkalýðsfélag Grindavíkur sem sendi frá sér harða ályktun: Útflutningsfyrirtæki hafi verið að sýna met afkomu undanfarin misseri og tekjuhærri hópar samfélagsins hafi verið að fá verulega hærri kjarabætur en verkafólk. Auk þess hafi stjórnendur og millistjórnendur fyrirtækja tekið sér miklar hækkanir umfram alla aðra, samkvæmt því sem fréttastofa Ríkisútvarpsins greinir frá.

Eftir þessa samþykkt er eins og slegið hafi að félagsmönnum á fundinum. Kannski hafa þeir litið út og séð Þorbjörn, Vísi og háhýsið, því þegar kom að vangaveltum um kröfur í komandi kjarasamningum gleyptu þeir hrá slagorð Vísismanna og félaga þeirra. Með orðin í hálsinum samþykkti félagið að óska eftir því að samið verði til tveggja til fjögurra ára í komandi kjarasamningum. „Þannig verði frekar hægt að tryggja stöðugleika í efnahagslífinu“, og ályktar, að eftir nokkur mögur ár í kjaramálum hnígi öll rök að því að verkafólki verði tryggðar tekjur til lágmarksframfærslu fyrir skikkanlegan vinnutíma, samkvæmt sömu heimild og áður var getið.

Hvílík snerpa, hvílíkur námsárangur.