Úlfar Þormóðsson 05/01/2017

Nýr sprellari

Þessa dagana er umræðan í þjóðlífinu eins og best gerist í góðu partíi og ekkert lát á gríninu. Þegar einn sprellari lýkur sögu tekur annar við og barnar hana. Og glaumurinn eykst. Eftir að fræðimaður á Veðurstofunni og forstjóri Kauphallarinnar höfðu glatt þjóðina með kímni sinni fyrstu fjóra daga ársins steig þriðji grínarinn fram á sviðið, Heiðar (Már) Guðjónsson, hagfræðingur. Hann hefur, einn fárra, kankast á við sjálfan sig; var skírður Már að millinafni, en lét afmá það á Hagstofunni sumarið  2015 meðal annars vegna þess að Már Guðmundsson, Seðlabankastjóri „ hefur svona lagt mig í einelti þannig að það er leiðinlegra að líkjast Má heldur en ekki“, hafði Nútíminn eftir honum af tilefninu.

Heiðar Már GuðjónssonKjarninn birti grein eftir Hreiðar (Má) í dag, 05.01.´17. Þar er hann að gamna sér við að endurskrifa mannkynssöguna og fjallar um Marxismann. Hann botnar þó ekkert í honum en tætir hann eigi að síður í sig og úr verður mikið sprell. Svo lýsir hann stöðu margra höfuðmála og fullyrðir að aldrei hafi mann­kyn­inu vegnað bet­ur og að aldrei hafi fátækt og hungur í heiminum verið minna en nú og bendir á „að plánetan hafi ekki verið grænni um árhund­raða skeið enda leiði auk­inn útblástur koltvísýrings til þess að aukin nær­ing skap­ast fyrir plönt­ur.  Meiri gró­andi  hefur gert ótt­ann um að skógar séu á und­an­haldi að engu“.  Þetta er í samræmi við þá glettni sem hann lét hafa eftir sér við Nútímann í október árið 2010: Kvaðst vera „bjartsýnn á framtíð Íslands og telur tækifæri liggja í hlýnun jarðar. Hann segir Ísland vera í öfundsverðri stöðu í framtíðinni, út í hafi, með nóg af æti, vatni og háhita.“ Þessa dagana er sprellarinn að bora eftir olíu norður í höfunum.

Vegna menntunar grínarans er rétt að draga fram þann þátt í sprellinu þar sem hann sem fjallar um gengismál. Fyrir skömmu taldi hann krónuna svo veika að það ætti að henda henni; nú finnst honum hún svo sterk að það verði að fella hana.

Þeim sem finnst maðurinn áhugaverður og þurfa meira grín í skammdeginu geta kynnst honum nánar á Wikipediu.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,792