Valgarður Guðjónsson 14/04/2014

Nýr flokkur?

Ég finn mig hvergi í stjórnmálaflokki. Fyrir það fyrsta þá er nú ekki mikið að græða á „vinstri“/“hægri“ skilgreiningum. Og jafnvel það sem hægt er að greina þar, hentar mér einfaldlega engan veginn.

En ég fæ stundum „áhugaskot“ þegar ég heyri af nýjum stjórnmálaflokki. Þetta gilti um Borgarahreyfinguna, Pírata, Bjarta framtíð, Lýðræðishreyfinguna og fleiri… En enginn þeirra náði að uppfylla ákveðin grundvallar atriði sem skipta mig máli.

Ég get nefnilega vel verið „hægri“ maður þegar kemur að því að einstaklingar eigi að hafa sem mest frelsi og vil meina að atvinnulífið þrífist best á framtaki einstaklinga sem njóta þess ef þeir standa sig vel. En það er lykilatriði að það sé jafnt gefið, allir hafi sömu möguleika og fylgi sömu leikreglum.

Ég get svo þess vegna verið „vinstri“ maður þegar kemur að því að hugsa um þá sem minna mega sín og tryggja öllum menntun og heilbrigðisþjónustu. En mér finnst fráleitt að ríkið standi í hvers kyns atvinnurekstri og vafstri sem einstaklingar geta full vel sinnt.

Ég er fylgjandi því að við göngum vel um umhverfið og náttúruna, en neita því ekki að of oft finnst mér umræðan kreddufull. Ég er alls ekki á móti öllum framkvæmdum og er engan veginn á því aldrei megi hreyfa við neinu, aðalatriðið er að velja vel, ganga vel frá og bæta hugsanlegt tjón.

Ég velti þessu fyrir mér í framhaldi af fréttum um mögulegan nýjan „hægri“ flokk.

Ætli það sé nokkur von til að, ef af verður, þá verði þetta flokkur sem leggur þær línur að:

  • að ríkið sinni fáum verkefnum, en sinni þeim verkefnum almennilega sem það er að sinna
  • að sömu reglur gildi fyrir alla og þeim sé fylgt eftir af alvöru
  • að komist verði að niðurstöðu með málefnalegri umræðu í hverju tilfelli fyrir sig, gagnrýni tekið, flokkslínur lagðar af og persónuþrasið, útúrsnúningarnir og skætingurinn skildar eftir í gömlu flokkunum
Flokkun : Pistlar
0,800