Nautabanarnir í Búðardal

Þeir hrópa, stórhugarnir með hálfbyggðu hótelin, ferðamálafrömuðirnir með ógreiddu bíla-leigu-bíla-lánin og fokheldu b&b íbúðirnar. Þeir hrópa á gengisfellingu, samradda og skrækróma, því þeir vita að stórútgerðin mun taka undir með þeim innan tíðar og væla bakraddir við gamla lagið þeirra. Og textann, hvert orð, hefur öllum skaranum tekist að læra með einstakri ástundun: Það verður að fella gengið ef ekki á illa að fara!

Mjálmið náði nýjum hæðum í gær þegar fréttist af því að afbókanir frá Noregi hefðu „hrúgast inn“; allt að 1.500 Norðmenn hættu við að koma til landsins! Hvílíkt og annað eins! Ástæðan: „Sterk staða krónunnar og gengissviptingar draga úr samkeppnishæfni Íslands sem ferðamannastaðar,“ vælir kórinn. „Stjórnvöld verða að taka tillit til ferðaþjónustunnar í peningastefnu sinni.“ Og líka þetta: „Hugsið ykkur hvernig þetta verður: Verðið á ferðunum hingað næsta vetur og næsta sumar hefur hækkað um fjörtíu prósent miðað við ferðirnar sem nú eru í gangi … Ég kalla eftir fyrirsjáanleika.“

Sigurbjörg Þrastardóttir rithöfundur hlaut Rauðu hrafnsfjöðrina, fyrir forvitnilegustu kynlífslýsingu ársins 2016 í íslenskum bókmenntum fyrir örsagnasafnið Óttaslegni trompetleikarinn og aðrar sögur. Þaðan er eftirfarandi texti:

„Með herkjum brölti nautabaninn í Búðardal þá á fætur, lagði leifarnar af róstbíf-samlokunni á sófaborðið og jafnaði sig stutta stund á mæðinni. Líklega þyrfti hann að fara að leita læknis. Svo gekk hann rólega að þvottahúsdyrunum þar sem húsfreyja hans lá á fjórum fótum, augu hennar svört af þrá, og áður en hann lokaði augunum greip nautabaninn í Búðardal um dyrakarminn með sínum grönnu fingrum því hann vissi af fenginni reynslu að hann myndi þurfa gott grip.“

Það er einmitt þetta sem þið nautabanarnir í Búðardal verið að gera: Að finna gott grip.  Leið til þess er að hætta að eyða peningum sem þið eigið ekki, taka til við að reka fyrirtæki af forsjálni og með hliðsjón af gengi krónunnar, að hætta gleypigangi sem einkennt hefur ykkur og offitað, og hugsa hvert leiðin liggur áður en lagt er af stað.

Og ekki síst þurfið þið að hætta heimtufrekjuköstunum áður en viðskiptamenn ykkar fá leið á vælinu og kæra sig ekki um ykkur lengur. Þannenig getið þið náð góðu gripi sem vísast gæti forðað ykkur frá falli.