Nafnleysinginn

Flestir ganga að því sem gefnu að Davíð Oddson sé sá sem skrifar ómerkta leiðara Morgunblaðsins, Staksteina og Reykjavíkurbréf. En það er samt allsendis óvíst. Það er annar ritstjóri að blaðinu, Haraldur Johannessen. Eitthvað skrifar hann. Og svo laumupennarnir úti í bæ, sem áður fyrr hétu einu nafni “húsmóðir í vesturbænum” og skrifuðu jöfnum höndum lesendabréf og leiðara.

Í leiðara Moggans í dag, 21.08.´17, fer nafnleysingi mikinn. Þar segir meðal annars:

“… hún (Katrín Jakobsdóttir formaður Vinstri grænna) víkur líka að flóttamannavandanum sem dynur á Evrópu þessi misserin. Af honum dregur hún sérkennilegar ályktanir. Hún segir öfgahreyfingar sem ali á ótta við „útlendinga og ólíka menningarheima“ hafa vaxið undanfarin ár. Og hún segir að hér á landi megi „sjá sömu orðræðu þar sem reynt hefur verið að stilla upp fátæku fólki og hælisleitendum sem andstæðingum sem berjist um þær krónur sem eru til í kassanum“. Katrín neitar með öðrum orðum að viðurkenna að óheftur flóttamannastraumur, jafnvel frá löndum þar sem ekkert bjátar á, leggi fjárhagslegar byrðar á þjóðir sem fyrir verða. Óraunsætt tal af þessu tagi gerir minna en ekkert gagn því að vandinn er fyrir hendi og milljarðar króna sem fara til flóttamanna verða ekki nýttir í annað.”

Vandlæting lík þessari hefur heyrst áður. Annarsstaðar. Einna helst hjá hræddu körlunum í Varðbergi. Formaður félagsins hefur til dæmis skrifað greinar í sama dúr. Eina þeirra má lesa á bjorn.is í dag. Þar segir:

“Að sögn vefsíðunnar Kjarnans hneykslaðist Katrín Jakobsdóttir, formaður VG, á því í setningarræðu á flokksráðsfundi VG laugardaginn 19. ágúst að sumir stjórnmálamenn kysu að gera mikið úr kostnaði við að taka á móti hælisleitendum og flóttamönnum í stað þess að ræða um ójöfnuðinn í samfélaginu þar sem ríkustu tíu prósentin eigi þrjá fjórðu alls auðs og ríkasta eina prósentið eigi um fjórðung. Hvernig á að skilja þessi orð? Að það dragi úr ójöfnuði í samfélaginu að taka á móti fleiri hælisleitendum frá öruggum löndum og hafa þá sem lengst á framfæri skattgreiðenda? Ábyrgðarlaust tal stjórnmálamanna á þennan veg er meðal annars ástæða fyrir fjölgun hælisleitenda sem aldrei fá hælisumsókn samþykkta hér vegna stöðunnar í heimalandi þeirra. Fjölgun hælisleitenda hér verður ekki til að minnka ójöfnuð í samfélaginu. Líklegt að aðstreymi fólks frá öruggum löndum hingað sé að undirlagi einhverra sem hagnast á ferðum fólksins og fá jafnvel hlutdeild í félagslegri fjárhagsaðstoð þeirra hér eða „svörtum“ launatekjum.”

Vilji menn bera saman texta á bjorn.is og Mogga er ljóst að þar er naumast greinanlegur munur á. Og enginn ef innihaldið er skoðað eitt og sér. Það gæti því allt eins hafa verið Haraldur Johannessen, Björn Bjarnason, Davíð Oddsson eða “húsmóðir úr vesturbænum” sem skrifaði Moggaleiðarann í dag. En auðvitað skiptir það engu máli. Þau ertu einn hugur, öll fjögur. Einn nafnleysingi. Það sem máli skiptir er að þetta er hin hreina rödd Sjálfstæðisflokksins.