Úlfar Þormóðsson 15/08/2017

Mothertongue – Muttersprache – Móðurmál

Björn Bjarnason, fyrrverandi menntamálaráðherra segir frá því í pistli í dag, 15. ágúst, að þýskur þingmaður, Jens Spahn hafi verið spurður af því af blaðamanni hvort hann mundi beita sér fyrir því á þýska þinginu að virkja þingmenn til að halda fram hlut þýskunnar af meiri þunga en nú væri gert, en þýska mun vera á undanhaldi á þarlendum veitingahúsum og víðar.  Spahn svaraði spurningunni játandi og sagði að ekki tækist að treysta samheldni íbúa Þýskalands nema allir töluðu þýsku.  

(Mynd: Árnastofnun)

Síðan í pistlinum víkur Björn að því þegar fyrirtæki skipta um nafn, breyta ágætu íslensku nafni í erlent, og nefnir Air Connect Iceland eins og Flugfélag Íslands heitir núna og segir síðan: “Það ber vott um skort á hugmyndaflugi og er misheppnuð tilraun til að vera heimsmaður að geta ekki valið íslensku fyrirtæki íslenskt nafn.”

Þetta er laukrétt hjá manninum.

Fyrir tæpum mánuði var lagt til hér á síðum Herðubreiðar að stofnuð yrði fyrirtækjanafnanefnd. Þar sagði síðan orðrétt: “Og af því að þetta er langt og ljótt orð gætum við nefnt hana Þórhall, nefndina, til heiðurs Þórhall Vilmundarsyni, prófessor. Þingið setji Þórhalli starfsreglur. Til Þórhalls verði vísað öllum þeim ónefnum sem eru í notkun og fyrirtækjunum gert að finna sér ný nöfn. Íslensk. Þeir sem móast við greiði dagsektir háar. Gerum þetta hratt og örugglega og áður en við verðum að frekara athlægi vegna heimótta. Hættum að skammast okkar fyrir að nota íslensku á Íslandi.”

Og þetta er laukrétt hjá Herðubreið.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,863