Mister mindfucking (svo)

Kristján Þór Júlíusson, heilbrigðisráðherra er mættur til leiks. Í Kastljósi gærkveldsins (29.02.´16) skýrði hann frá auknum fjárveitingum til heilsugæslu á höfuðborgarsvæðinu, „og þjónustan sem þar verði í boði verði á breiðari grunni … Fjölgun einkarekinna heilsugæslustöðva sé nauðsynleg til að rjúfa stöðnun … Síðan hafa menn mismunandi skoðun á því hvernig rekstarfyrirkomulagið á að vera,“ svo vitnað sé í orð hans. Þetta skilja flestir. En svo syrtir í álinn og merkingin fellur burt úr orðunum; ráðherrann beitir andyrðum með marleysu, líkt og maður sem talar upp úr svefni.

„Greiðslumódelið sem við erum að tala um, það er í rauninni þannig að þetta er fjármögnun eftir sjúklingum, skjólstæðingum heilsugæslustöðvarinnar. […] Því er deilt út á 213.356 einstaklinga sem búa hér í þessu heilbrigðisumdæmi. 90% af fjármögnuninni er fast og þar ráða tveir stærstu liðirnir, kyn og aldur og sjúkdómabyrði. Mest fyrir yngsta hópinn, svo léttir á því, svo kemur ákveðinn þungi í miðjunni og svo þyngist það eftir því sem skjólstæðingarnir eru eldri og með meiri sjúkdómabyrði. 10% af fjármögnuninni fer eftir gæðum og þeim kröfum sem byggðar eru upp í lýsingu á því starfi sem við viljum að fari fram á heilsugæslustöð og hefur aldrei verið sett niður með þessum hætti. Það er að segja kröfulýsingu um það, hvernig við viljum að heilsugæslan vinni hérna. Og þá gildir það sama, burtséð frá því hvert rekstrarformið er.“

Það er erfitt að segja um hvað þessi runa fjallar, jafnvel ómögulegt. Þess vegna er  ekki hægt að rökræða um málið. Framsetning af þessum toga er kölluð mindfucking í hinum enskumælandi heimi og snýst um að afskræma tungumálið og breyta merkingu orða og hugtaka. Markvisst. Slík framsetning minnkar vitsmunalega getu lesandans til þess að draga ályktanir af því sem verið er að fjalla um. Þar af leiðandi á hann minni möguleika á að taka skynsamlegar ákvarðanir í þeim málum sem til umræðu eru og fokkað er í.

Að þessu sögðu er fyrirmaðurinn beðinn um að hætta að fokka í fólki og tala til þess á móðurmálinu sem hann kunni ágæta vel áður en  hann sofnaði í ráðherrastólnum.