Úlfar Þormóðsson 29/10/2016

Miljónakallinn

Miljónakall Framsóknarflokksins keypti allita tólfblöðung inn í Moggann í dag, kjördag, fyllti hann af grobbsögum og loforðum og borgaði svo fyrir aldreifingu á blaðinu. Og þarna brosa þeir, Frammararnir, í tólfblöðungnum, reyna það að minnsta kosti.Framsókn

En.

Þeir skilja eftir stórar spurningar. Þær vakna við lestur miðopnu tólfblöðungsins. Þar er sagt frá þeim dólgslegu skrifum, sem „hrægammarnir“ hafa birt í flenniauglýsingum að undanförnu, og greint frá orsökum þessa uppátækis þeirra í máli og myndum. Það, uppátækið, er fullyrt að stafi af engu öðru en óstjórnlegi hræðsla allra aflandskrónueigenda við Sigmund Davíð og Framsóknarflokkinn. Þar er að finna óvin „hrægammanna“ númer eitt.

Og hverjar eru þá spurningarnar?

Þær vakna þegar textahöfundur greinir frá glænýrri og hyldjúpri ást „hrægammanna“ á félagshyggju og logandi þrá þeirra eftir vinstri stjórn á Íslandi. Og þá er spurt: Hver skrifaði auglýsingarnar fyrir aflandskrónueigendurna? Hvaða gammur? Og óneitanlega vaknar grunur: Það skyldi þó ekki hafa verið íslenskur aflandskrónueigandi?

Miljónakall Framsóknarflokksins keypti allita tólfblöðung inn í Moggann og borgaði fyrir aldreifingu á blaðinu. Það er erfitt að eiga peninga á Íslandi. Ekki síst ef miljónkallinn er í framboði.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
3,219