Menntamálaráðherra vill bjarga íslenskunni. Um stundarsakir kostar það tvær til þrjár milljónir

Fréttaskýring

Við munum geta talað íslensku við heimilistækin okkar eftir nokkur ár. Því verður bjargað.

Þetta sagði Kristján Þór Júlíusson menntamálaráðherra í viðtali á Morgunvakt Rásar eitt í morgun.

Hann tók þar undir sjónarmið Eiríks Rögnvaldssonar prófessors, sem var í viðtali á sama vettvangi daginn áður.

Eiríkur benti á að tækniþróun og þar með notkun okkar á ensku í daglegu lífi væri svo hröð, að engan tíma mætti missa til að bregðast við.

Undir þetta tók menntamálaráðherra. Hann vísaði þó til þess að stefnumörkun stæði yfir og allt tæki sinn tíma.

Á sama tíma ber svo við, að ekki verða teknir inn nýir nemendur í meistaranámi í máltækni á hausti komanda að óbreyttu.

Meginástæðan er fjárskortur.

Samkvæmt upplýsingum Herðubreiðar vantar þó sáralítið fé svo að unnt sé að halda samfellu í þessu námi, sem flestir virðast á einu máli um að sé hið nauðsynlegasta fyrir íslenska tungu og menningarlegt sjálfstæði þjóðarinnar.

Þar er nefnd talan tvær til þrjár milljónir.

Nám í máltækni er þverfaglegt og spannar meðal annars tölvunarfræði, málvísindi, gervigreind, tölfræði og sálfræði. Máltækni miðar að því að þróa búnað sem getur unnið með og skilið náttúruleg tungumál og stuðla að notkun þeirra í samskiptum manns og tölvu, eins og segir á vef Háskóla Íslands.

Herðubreið er kunnugt um að einstaklingar hafi lýst áhuga á náminu og viljað sækja um, en verið vísað frá.

Meginástæðan er, eins og áður sagði, fjárskortur upp á örfáar milljónir.