Ritstjóri Herðubreiðar 22/05/2014

Margrétarlof

Eftir Þórarin Eldjárn

Aðal ungrar þjóðar

orðin voru forðum.

Efldist sögualdar

andi í nýju landi.

Síðan aldrei seiður

sagna hefur þagnað.

Skráður var á skræður

skinnið treysti minnið.

 

Þjóðin vondan vanda

varð að þola og harðan.

Bágur hrundi hagur

handrit fóru úr landi.

Best þar fengu fóstur:

fræðimenn í næði

bækur dá og dekra

dönskum silkihönskum.

 

Ótal rit í útlegð

undu á Dana grundu

aftur skilað eftir

aldir margar kaldar.

Þetta er þakkarvottur

þýðinga um síðir

neyta má og njóta

á nýrri dönsku og skýrri.

 

Hvatning Dana drottning

dygga veitti og trygga

starfi þessu þörfu

það er skráð á blaði.

Loftunga enn lifir

læðir þökk í kvæði.

Margrétar hér mærir

mildi og dug Þórhildar.

Þórarinn Eldjárn, drápa flutt í Amalíuborgarhöll 21. maí 2014

Flokkun : Ljóðið
1,806