trusted online casino malaysia
Úlfar Þormóðsson 07/01/2017

Löggælur

Dekur virkar oftar en ekki þannig að sá sem dekrað er við vill æ meira eftirlæti. Íslenskir auðmenn (og konur) hafa verið og eru dekurdýr. Þeir hafa sjálfir, með dyggri aðstoð aðdáenda sinna, samið flest gildandi lög í landinu, þar með talin lög um fjármálagjörninga, fjárfestingar og flutning fjármuna milli landa. Gisin lög með mörgum afleggjurum. Lög sem færa þeim sem þekkja þau tækifæri til refsilausra „undanskota“, sem er fínyrði yfir lögbrot. Þetta eru gælur, löggælur.

Peningar, auðmenn

Auður spillir flestum mönnum. Íslensku peningamennirnir, dekurdýrin, eru spilltir, margir hverjir. Þeir hafa laumað peningum sínum úr landi eftir hjáleiðum óljósra lagatexta, nær sex hundruð þúsund miljónum, til þess að þurfa ekki að greiða skatt af þeim hérlendis. Þeir vilja ekki taka þátt í rekstri samfélagsins, ekki borga skólagöngu barna, sjúkrahúsvist eða elliheimilispláss landa sinna. Þeir vilja einungis fleyta rjómann ofan af sameiginlegu mjólkurtrogi landsmanna.

Fyrir síðustu alþingiskosningar urðu leikbræður dekurdýranna, ráðherrar þeirra og þingmenn, fyrir þrýstingi frá almenningi sem vill að laumuféð sé flutt heim og skattlagt hér. Leikbræðurnir sögðust ætla að verða við þeirri kröfu. Allt fram á kjördag. Svo breytist tónninn. Gælur hófust. Dekurdýrunum var ekki hótað málaferlum og sektum heldur er þeim boðinn aflausn og skattaafsláttur ef þau koma með féð heim svo hægt sé að skattleggja það hérlendis eins og tekjur okkar annarra. En þau svara engu, dekurdýrin. Hjá þeim gildir þögnin. Og hrokinn.

Á þjóðveldisöld og kannski eitthvað lengur var ekki óalgengt að menn væru dæmdir til útlegðar fyrir brot á gildandi lögum. Það er harður dómur. Eigi að síður eru einhverjir töfrar yfir honum; áminning og tyftun, eins konar tamning, ögun; ábending um ábyrgðarfyllra líf.

Það  er auðvitað til of mikils mælst að fara fram á það við alþingi að það semji og samþykki lög um útlegðardóma svo hægt sé að koma þeim yfir gæludýrin sem sem ekki gjalda keisaranum það sem keisarans er, svo vitnað sé í frelsara þeirra; lög sem heimila að gera gæludýrin útlæg af landinu þar til þau koma með falda fjármuni hingað heim. En ég geri það eigi að síður. Bið um að þetta verði gert. Þetta gætu orðið mannbætandi lög.

Latest posts by Úlfar Þormóðsson (see all)
Flokkun : Efst á baugi
1,426