Litlu börnin leika sér

Nú eru góðir dagar hjá hræddu köllunum á Varðbergi. Nató-herinn er nýbúinn að fljúga um lofthelgina og hreinsa hana af óværu, sjóherinn er enn að æfa skotfimi við strendurnar og stýra nýjustu gerð af kafbátaleitartækjum í leit að óvinum við strendur landsins. Þeir þekkja hann nefnilega, óvininn, hræddu kallarnir. Það er frjálshyggjurússinn, Hann er óútreiknanlegur fjandi. Því þótt Rússinn sé ekki kommúnisti lengur, þá var hann það lengi, lengi og það er aldrei að vita nema hann sé að þykjast vera kapítalisti, helvítið á honum.

Þetta eru góðir dagar, svo góðir dagar, að hræddu kallarnir þurfa ekkert að óttast og geta farið í búðarleik með fimm-miljónkallinum í Kauphöllinni. Verslað með skortsölu. Hann bauð þeim til leiks í Mogganum í dag (ef ég man rétt), fimm-miljónkallinn; dró leikreglurnar saman og birti þær í ramma undir fyrirsögninni

Umgjörð um skortsölu

» Skortsala virkar þannig að verðbréf eru fengin að láni gegn þóknun og seld í von um að þau muni lækka í verði. » Þannig er svartsýnum gefið sama tækifæri og bjartsýnum til að tjá skoðun sína á markaði. » Með skortsölu er stuðlað að réttri verðmyndun á markaði. » Ný lög auka gagnsæi og treysta umgjörð um skortsölu, sem er lítið stunduð hérlendis.

Þetta eru góðir dagar fyrir hrædda kalla til þess að leika sér. Og auka skortsölu. Undir vernd.