Leti?

Það er ástæða til þess að velta því fyrir hvers vegna forsætisráðherrann talar oft út úr kú þegar fréttamanna leggja spurningar fyrir hann. Í Kastljósi gærkvöldsins var hann spurður að því hvort hann teldi 600 miljón króna framlag til viðhalds á húsakosti Landsspítalans á fjárlögum næsta árs vera nóg þegar vitað er að 2000 miljónir þarf til þess að halda í horfinu. Ráðherrann svaraði ekki spurningunni heldur fór með tveggja ára gamla þulu um, að aldrei hefði meira fé verið varið til spítalans … aldrei hefði orðið önnur eins hækkun á framlögum.

Af hverju talar hann svona, maðurinn?

Nú vitum við úr fréttum, almennir borgarar, að þrengslin á spítalanum eru óboðleg veiku fólki og þeim sem eiga að hlúa að því; sjúklingar liggja í rúmum meðfram gangaveggjum og til að draga úr vandanum hefur gámum verið hrúgað upp við sjúkrahúsið. Við vitum líka að húsnæði spítalans er heilsuspillandi vegna leka og myglusvepps. Þessu til við bótar hefur framkvæmdastjóri fjármálasviðs Landspítalans látið hafa eftir sér, að „eitt af því sem er mjög brýnt að gera er að bæta við skurðstofu í Fossvoginn.“  Og vandinn langt í frá allur upp talinn; sá vandi sem við vitum af, almenningur. En ekki ráðherrann, forsætisráðherrann. Hann veit þetta ekki. Hvers vegna? Hvers vegna að veita 600 miljónum í verk sem þarf 2000 miljónir til þess að vinna á sama tíma og ráðherrar tala um að nóg sé til af peningum?

Af hverju stafar fáviska ráðherrans? Hlustar hann ekki á fréttir? Eða stafar hún af því að hann nennir ekki að sitja þingfundi þar sem fjárþörf spítalans hefur margoft verið til umræðu? Eða lokar hann eyrunum vegna þess að hann ætlar að brjóta niður spítalakerfið í landinu, svelta það til einkavæðingar? Er viðhorf hans til Landspítalans flétta gerð úr frjálshyggju og leti?