Landið þar sem 11-14 prósent teljast „engir vextir.“ Dæmi af spjaldtölvu

Í netverslun Elko er hægt að kaupa Samsung spjaldtölvu fyrir 56.700 krónur staðgreitt. Hún fæst einnig með afborgunum í tólf mánuði vaxtalaust og kostar þá 62.764 krónur. Sérstaklega er tekið fram að af þessu láni í eitt ár séu „0% vextir,“ þótt endanleg upphæð sé næstum 11 prósentum hærri en staðgreiðsluverðið.

Fram kemur að neytandinn greiðir 3,5 prósenta lántökugjald og að auki 340 krónur vegna hverrar greiðslu, en ekki er tilgreint hvaða kostnaður það er.

Í sömu netverslun er hægt að kaupa sömu tölvu á 68.310 krónur, rúmlega 20 prósent hærri upphæð en staðgreiðsluverðið. Þá eru boðnar – í gegnum Netgíró – afborganir í 18 mánuði, aftur alveg „vaxtalaust.“

Í þessu tilboði er líka 3,5 prósenta lántökugjald, en við bætist 340 króna „seðilgjald“ (þótt greitt sé í gegnum tölvu og engir seðlar gefnir út) og „tilkynningargjald“ upp á 195 krónur fyrir hverja greiðslu. Ekki kemur fram í hverju sá kostnaður liggur.

Samkvæmt lauslegum útreikningum Herðubreiðar jafngilda lántökukostnaðurinn og önnur gjöld 13-14 vaxtaprósentum á ári.