Kvöldljóð í mars

Skýin, skuggar á himnatjaldi.

Birtan roðnar ívið
á fótumtroðnum snjó útí garði hjá mér.

Jafndægur á vori, veraldarundur.

(Þú sprettharða tímans tönn)

Ég tel klukkustundir á fingrunum til staðfestingar.
Stendur heima. Nú er jafn bjart og það er dimmt.

Ó réttláta úthlutun ljóssins! Ég vakna til þess. Til þess!

Og úrskurða andlát skammdegis.

Í andakt

Ég trúi á upprisu grasanna og eilífan sprett.

Steinunn Sigurðardóttir (Veðratími)