trusted online casino malaysia
Úlfar Þormóðsson 01/06/2016

Krónustýring

Það er alkunna að tekjulágt fólk leiti ekki til læknis af því að það hefur ekki efni á því. Mörgum þykir að ekki sé hægt að una við það í jafn ríku samfélagi og við búum í. Þess vegna hafa stjórnmálamenn á vinstri vængnum rætt um að fella niður komugjöld einstaklinga í heilbrigðiskerfinu og fjármagna þjónustuna þess í stað með auðlegðarskatti og/eða hækkun veiðigjalda.

Medical-DoctorVísir.is hefur eftir landlækni þann 30. maí síðast liðinn að það sé ekki æskilegt að bjóða gjaldfrjálsa heilbrigðisþjónustu, enda séu „gjöld notuð til að stýra fólki á rétt þjónustustig.“ Hann bætir því síðan við að það sé ekki góð hugmynd að fella niður komugjöld í heilbrigðiskerfinu. Einnig segir hann að stjórnmálamenn ættu að fara varlega í að boða gjaldfrjálsa heilbrigðisþjónustu. „Það er sjálfsagt ákveðin leið til þess að veiða atkvæði, en mér finnst það ekki vera mjög heiðarleg kosningabarátta, ef ég á að segja alveg eins og er,” hefur miðillinn eftir honum í lok fréttarinnar.

Landlæknir kom hingað til starfa frá Svíþjóð með ferskum gusti og sagði okkur til syndanna með rökum. Hann hefur unnið gott starf. En allt í einu er eins og hann sé kominn með þjóðareinkenni íslenska heimalningsins; talar án skýringa, fullyrðir án raka. Það sæmir honum ekki. Þess vegna þyrfti hann, fyrr en seinna, að skýra eftirfarandi með rökum:

Hvernig stýra peningar því að við, fárveikur og fávís lýðurinn í leit að lækningu, römbum á rétt þjónustustig innan heilbrigðiskerfisins? Merkir þetta að við eigum meiri batavon eftir því sem við látum meira fé af hendi? Hver eru rökin fyrir því að það sé góð og gild hugmynd að láta bataveg hins veika ráðast af fjárráðum hans? Hvað er slæmt við að fella niður komugjöld og fyrir hvern er það vont? Og svo þetta: Hvað er óheiðarlegt við það að stjórnmálamaður segi kjósendum að hann vilji berjast fyrir því að fólk geti leitað til læknis sér að kostnaðarlausu?

Latest posts by Úlfar Þormóðsson (see all)
Flokkun : Efst á baugi
1,354