Úlfar Þormóðsson 26/02/2015

Kröm

 

Íslensku byssuliðarnir eru enn og aftur roknir af stað með kröfur sínar um að vopnvæða lögregluna frekar en orðið er. Þær eru í nýjum búningi.  Þeir þykjast einvörðungu vera að sækjast eftir því að lögreglan fái yfirgripsmeiri heimild til þess að kanna bakgrunn fólks, hegðun þess og hugsanagang. Þegar það er fengið munu þeir svo segja okkur að rannsóknir þeirra hafi leitt í ljós að skefjalaust ofbeldi kraumi undir niðri hjá fjölda fólks og bíði þess eins að brjótast út í hryðjuverkum og ekki sé annað hægt en búa lögregluna nýjum og harðdrægari vopnum ef koma eigi í veg fyrir hörmungar.

Stríðshanski

Þeir beita hræðsluáróðri og hafa fengið fjölmiðla landsins til þess að gleypa við honum. Björn Bjarnason, fyrrverandi ráðherra hóf áróðursherferðina sísvona með pistli mánudaginn 23. þessa mánaðar: Nú eru hér á landi tveir hælisleitendur eftirlýstir á Norðurlöndunum og hefur verið óskað eftir framsali þeirra. Miðvikudaginn 25 er fimmdálka fyrirsögn á forsíðu Morgunblaðsins: Vígamenn fóru um Ísland. (Hugsa sér, ónefndir menn í áætlunarflugi!) Dv.is sama dag: Vígamenn ferðast í gegn um Ísland. Segjast einnig vita um einstaklinga á Íslandi.(Á líklega að merkja að vitað sé um vígamenn sem dvelji hérlendis!) Ríkisútvarpið 25.02: (Hækkað) hættustig vegna hryðjuverkaárása. Kastljós sama dag: Ísland er gegnumstreymisland!

Brellan er sú að birta þetta núna meðan fólk er enn óttaslegið eftir morð og uppþot í Frakklandi og Danmörku sem ætlað var að hefta málsfrelsi. Nota óttann til þess að telja fólki trú um að eina ráðið gegn ofbeldi sé vopnað lögreglulið. En þrátt fyrir áróðurinn hefur ekki verið sýnt fram á það með rökum að hætta af hryðjuverkum hafi aukist hérlendis og hvergi í heiminum hefur verið sýnt fram á það að hervæðing lögreglu dragi úr ofbeldi.

Offorsið sem nú er beitt til þess að hræða okkur og hrella er auvirðileg brella manna sem alltaf eru hræddir við hvaðeina sem ekki er eins í dag og í gær. Þeir þurfa læknis við.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,906