Kópavogssáttmáli
Þá er hún tilbúin. Næsta ríkisstjórn. Eða svo til. Allt komið í hús nema nöfn þeirra sem eiga að sitja í henni. Það er gott. Hún leggur í´ann með göfug markmið, en óljós mörg, eins og sést þegar rennt er yfir sáttmálann sem flokkarnir þrír gerðu áður en þeir ólu hana af sér, stjórnina. Það er hins vegar fátt sagt um aðferðirnar sem á að beita, um leiðirnar sem á að fara, til þess að ná markmiðunum. Í samgöngumálum er þó fyllilega gefið í skyn að þar eigi að grípa til einkavæðingar; sjálfsagt er átt við að einstaklingar eignist vegi og brýr og jarðgöng þótt það sé ekki sagt berum orðum fremur en annað. En hvað um það og eigi að síður er ekki nema sjálfsagt og eðlilegt að óska henni góðrar ferðar, stjórninni, og að flokkarnir þrír megi eiga samfarir góðar næstur misserin, biðja þess þjóðarinnar vegna.
Framanskráð var skrifað fyrir klukkan 21:30 þann 10. Janúar 2017. Þá sá ég þetta á mbl.is:
„Bjarni Benediktsson bar upp tilnefningar í fimm ráðherraembætti á þingflokksfundi Sjálfstæðisflokkins í Valhöll fyrir skömmu. Þórdís Kolbrún Reykfjörð Gylfadóttir verður ráðherra ferðamála, iðnaðar og nýsköpunar, Guðlaugur Þór Þórðarson verður utanríksiráðherra, Sigríður Andersen verður dómsmálaráðherra, Jón Gunnarsson verður ráðherra samgöngumála, byggðamála, sveitastjórnarmála og Kristján Þór Júlíusson verður áfram (svo) menntamálaráðherra.“ (Ritvillurnar eru að þessu sinni mbl.is).
Nú er það svo að framgangur mála ræðst ærið oft af þeim einstaklingum sem með þau fara, þeim ber þau fram, þeim sem ræður. Og það lofar ekki góðu fyrir samfélagið að maðurinn sem hófst handa við að brjóta niður sjúkrahúskerfið í landinu, varaformaður evrópskra íhalds- og fasistaflokka setjist í stól utanríkisráðherra. Að maður þjóðkunnur af öllu öðru en sáttvísi og samningsvilja eigi að annast byggða- og sveitastjórnarmál. Að sofandi maður, sem mbl.is veit ekki einu sinni hvaða embætti hefur gegnt undanfarin ár, eigi að taka við, sjá um, annast og efla menntamál í landinu.
Þetta er hrokafull ráðherraskipan. Það felst í henni stefnuyfirlýsing sem vekur ugg. Og ég sem ætlaði að vera bjartsýnn alla lífdaga nýrrar ríkisstjórnar þar til … já, og þrátt fyrir það, að bæjarstjórinn í Kópavogi vilji láta kalla stjórnina Kópavogsstjórn vegna þess að þar skrifuðu foringjar flokkanna undir sáttmálann sín á milli, þó að á almanna vitorði sé hvaða gerðist hér á öldum áður eftir að skrifað hafði verið undir sáttmála í Kópavogi.
- Sálumessa - 02/07/2020
- Umhverfisvændi - 21/04/2020
- Er brennivínið besti kostur? - 26/03/2020