Úlfar Þormóðsson 03/06/2015

Kleina

Siðferði Morgunblaðsins hefur oftar en ekki verið undarlegt. Reikult? Hæpið? Breytilegt? Já, það er kannski helsta einkennið, breytilegt viðmið eftir um hvað og hvern er fjallað. Eins og flestir vita ræðst siðferði blaðs að mestu af því hver stýrir því.

Í síðustu viku reiddi Mogginn til höggs og vildi rota þrjótinn Steingrím J. Sigfússon fyrir svik við þjóðina við framsal á eign­ar­hlut rík­is­ins í Íslands­banka og Ari­on banka. Samdægurs kom í ljós að um klámhögg var að ræða. Eigi að síður hélt blaðið áfram að slá frá sér. Og gerir enn.

Davíð Oddsson

Í dag leiðir blaðið fram svo trúverðug vitni sem Lilju Mósesdóttur og Atla Gíslason, sem nú er líka skrifaður Ingibjargar, ef til vill af femínískum ástæðum. Þau voru þingmenn Vinstri grænna, vildu verða ráðherrar í síðustu ríkisstjórn, nutu ekki trausts til þess og gengu úr flokknum. Þau samþykktu gerðir Steingríms J. á þinginu í umræddum bankamálum en vitna nú gegn sjálfum sér og honum. „Hann lék ein­leik sem var hans stíll, ær og kýr,“ er haft eftir Atla Ingibjargar í Mogganum í dag.

Vigdís Hauksdóttir, alþingismaður er sleip í siðferðinu eins og alkunna er. Í gær hljóp hún undir bagga með Mogganum og krafðist þess á alþingi að Steingrímur gerði grein fyrir svikum sínum og vitnaði til stjórnarskrárinnar með kröfuna. Hún fékk að vita það sem flestallir vissu, að málið hefur legið ljóst fyrir í þingskjölum í sex ár. Þetta átti hún að vita. Og kannski vissi hún það. En spurði samt.

En hvers vegna lætur konan svona? Og Mogginn?

Svar við því gæti verið að finna í grein eftir fyrrverandi aðstoðarritstjóra Morgunblaðsins, Björn Bjarnason, fyrrverandi ráðherra, sem hlýtur að gjörþekkja aðferðafræði Moggans og siðferði.

Björn Bjarnason

Í gær skrifar hann á http://bjorn.blog.is/ um hið harmræna fjárkúgunarmál gegn forsætisráðherra landsins. Upp á grínið og gagnsemina ætla ég að birta glefsur úr ritgerð Björns en skipta um nöfn á þeim sem fjallað er um. Breytingar mínar eru skáletraðar. Þá líta skrifin svona út:

„Því virðast lítil takmörk sett hvaða leiðir eru farnar til að ná sér niðri á stjórnmálamönnum eða til að vekja umtal og ala á grunsemdum. Þetta sannaðist í dag þegar fréttir bárust af því að Steingrímur J. Sigfússon, fyrrverandi fjármálaráðherra, hefði framselt eign­ar­hlut rík­is­ins í Íslands­banka og Ari­on banka án lagaheimildar.“

„Hér skal látið hjá líða að fara ofan í efnisatriði þessa furðulega máls. Gefið er til kynna að þar búi atvik að baki sem eiga ekkert skylt við stjórnmál …“.

„Hafi það verið ætlun höfundar þessara fréttar að draga nafn Steingríms J. niður í svaðið má segja að það hafi tekist þegar litið er til orða Vigdísar Hauksdóttur, alþingismanns og skrifa Morgunblaðsins.“

„Vigdís er fræg fyrir öfgakennd en ástæðulaus viðbrögð. Morgunblaðið er þaulsetnast(a) málgagn(s) íslenskra fésýslumanna til lands og sjávar enda taka þeir sjálf(ur)(ir) til máls í því blaði…“.

 

Þessi umsnúningur á grein fyrirverandi aðstoðarritstjóra kastar björtu ljósi á mörg skrif Morgunblaðsins fyrr og síðar.

Úlfar Þormóðsson
Latest posts by Úlfar Þormóðsson (see all)
Flokkun : Pistlar
1,909