trusted online casino malaysia
Úlfar Þormóðsson 16/02/2018

Kjánagangur

Viðskiptalífið gengur fyrir auglýsingum. Íslandsbanki er að keppa eftir nýjum viðskiptavinum með því að slá sig til riddara með uppátæki sem nefnist “Meistaramánuður Íslandsbanka” og auglýsir í blöðum til þess að búa til falska ímynd af sér; fá fólk til þess að trúa því að Íslandsbanki sé eitthvað annað en peningastofnun?

Óhjákvæmilega vakna spurningar vegna peningaausturs bankans í svo kjánalegt uppátæki. Til dæmis þessar: Hvað fær Stöð 2 mikið greitt fyrir að vera daglega með fréttir af breytilegum “áheitum” fólks í “Meistaramánuði”, fyrir viðtöl um “Meistaramánuð” í þættinum Ísland í dag? Er þetta ekki keypt umfjöllun, klædd í búning frétta til þess að þurfa ekki að heita auglýsing? Æskilegt væri að Stöð 2 “héti” því að birta undanbragðalaus svör við spurningunum áður en “Meistaramánuðurinn” er úti til þess að eyða misskilningi ef einhver er.

Og stjórnmálamenn. Þeir þurfa sko líka sínar auglýsingar. Eyþór Arnalds, frambjóðandi til borgarstjórnar er þar ekki undanskilinn. Hann notar ókeypis auglýsingar af færni og nokkru yfirlæti. Hann er alls staðar. Einkum þar sem ekki hefði mátt búast við honum. Hann mætti óboðinn í Höfða þar sem borgarfulltrúar héldu fund með þingmönnum kjördæmisins þótt hann hafi ekki verið boðaður og gegni hvorugu starfinu. Hann þarf og vill vera til sýnis og veit að veislur og mannfagnaður er góður auglýsingavettvangur með blaðaljósmyndum og merkingarlausum örtextum. Nú, kl. 12:40 þann 16. febrúar 2018, er brosmynd af honum á Vísi.is. Þar er hann með þingmönnum Sjálfstæðisflokksins og Andersen ráðherra á Lögreglustöðinni í Reykjavík, frjáls og brosandi, einn utan þingliðs. Vísir segir að að um hafi verið að “ræða hálfopinbera heimsókn” þessa fína flokks.

Meistaramánuðurinn og fréttirnar af Eyþóri alls staðar vekja aulahroll. Það má. Hver og einn hefur  rétt á því að sinna eigin sjálfseyðingarhvöt hvort sem hann borgar fyrir það eða með peningum eða með því að mæta alls staðar. Það má eyðileggja fyrir sér með aulahætti. Og líka með því að vera alls staðar.

 

Latest posts by Úlfar Þormóðsson (see all)
Flokkun : Efst á baugi
1,774