Úlfar Þormóðsson 25/01/2017

Keflavíkurleiðin

Keflavík (Reykjanesbær) seldi allar eigur sínar til einkaaðila (nema skolplagnir) og gerðist leigutaki hjá þeim sem keyptu. Þetta átti að auka hagkvæmni í rekstri, draga úr áhættu, minnka líkur á hagsmunaárekstrum og gera bænum fært að greiða niður skuldir. Þannig fór það ekki. Skuldir jukust og bærinn hefur rambað á barmi gjaldþrots í allmörg ár.

kindur-a-garda

Hin nýkaraða ríkisstjórn Sjálfstæðisflokksins boðar stórsókn í uppbyggingu innviða. Í sömu andrá leggur Viðskiptaráð Íslands (VÍ) til að ríkissjóður fari Keflavíkurleiðina; selji allar sínar skrifstofubyggingar, 120 talsins, 280 íbúðir sem það á, 20 lögreglustöðvar vítt og breitt um landið og 20 kirkjur. VÍ telur að hægt sé að draga úr sóun, auka hagkvæmni í ríkisrekstri, draga úr áhættu, minnka líkur á hagsmunaárekstrum og greiða niður skuldir ríkissjóðs með því að ráðast í hina umfangsmiklu eignasölu. Einnig leggur VÍ til að Reykjavíkurborg spari með því að selja fyrirtæki sem skilar 100 miljón króna hagnaði á ári.  Einkahlutafélag vill kaupa Hellisheiðarvirkjun af borginni.

Á nýjan leik er verið að magna upp slagorðin „best í heimi“. Forsætisráðherra segir framleiðslu hér þá mestu í heimi. Sama dag og málgagn hans slær þessu upp á forsíðu má lesa frétt um það að 875-1.525 millj­ón­ir króna séu í bónu­s­kerfi Glitn­is „sem virkjaðist“ 19. janú­ar síðastliðinn. Bónusarnir verða til útgreiðslu síðar á árinu. Allt að fimm manns munu fá þá. Gengið sígur. Pundið, sem fór niður undir 136 krónur er nú 145,41 króna. Evran sem kostaði fyrir kosningar tæpar 119 krónur er í dag, 25.01.’17, skráð á 124,42 krónur.

Ríkisstjórn Sjálfstæðisflokksins boðar stórsókn í uppbyggingu innviða; „framleiðslan hér er sú mesta í heimi“. Veislan er hafin; það er verið að gefa á garðann, stjórnin boðar stórsókn í uppbyggingu innviða.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
1,434