Jón Steinar lagði Bjarna Ben. og Sigmundi Davíð til línuna í Icesave: „Messan virtist hafa áhrif“

Vorið 2009 komu Bjarni Benediktsson og Sigmundur Davíð Gunnlaugsson, báðir nýkjörnir formenn flokka sinna, á fund Jóns Steinars Gunnlaugssonar, sem þá var hæstaréttardómari.

Tilefnið var að hlýða á skoðanir Jóns Steinars á Icesave-málinu, sem þá hafði lítt ratað í fréttir sem alvarlegt umfjöllunarefni. Frá þessu greinir í nýútkominni bók Jóns Steinars, Í krafti sannfæringar.

Forsaga málsins var sú, að Geir H. Haarde forsætisráðherra hringdi í Jón Steinar að morgni dags 11. nóvember 2008 í leit að lögfræðiráðgjöf um Icesave, en nánast engir þekktu efni þess utan stjórnkerfisins þegar þarna var komið sögu.

Jón Steinar svaraði Geir með tölvubréfi kl. 7.45 þann sama morgun, þar sem hann gerði grein fyrir sjónarmiðum sínum í málinu, þar sem meginatriðin voru að íslenska ríkið bæri ekki ábyrgð á skuldbindingum Tryggingasjóðs innistæðna og að úr ágreiningi bæri að skera fyrir dómstólum.

Síðan segir í bók Jóns Steinars:

„Þegar kom fram á árið 2009 lét Geir af formennsku í Sjálfstæðisflokknum. Við tók Bjarni Benediktsson. Á tímabili naut hann aðstoðar Sigurðar Kára Kristjánssonar, sem verið hafði alþingismaður en náði ekki endurkjöri í kosningunum 2009. […]

Svo atvikaðist að þeir félagar Bjarni og Sigurður Kári komu einhvern tíma snemma árs 2009 í heimsókn til mín til að ræða Icesave-málið. Ég lagði áherslu á við Bjarna að fylgja þeirri stefnu sem fólst í skeytinu sem ég hafði sent Geir. Ég man vel að ég tjáði honum þá skoðun að líklega hefði ungur og upprennandi stjórnmálaforingi aldrei fyrr á Íslandi fengið upp í hendurnar annað eins tækifæri til að veita pólitíska forystu fyrir jafnsterku réttlætis- og hagsmunamáli þjóðar sinnar. Sigurður Kári tók undir með mér að öllu leyti. Þegar fundinum lauk vonaði ég að tekist hefði að sannfæra Bjarna.

Stuttu síðar höfðu þeir félagar samband við mig á ný og vildu koma aftur og í þetta skiptið með Sigmund Davíð Gunnlaugsson, nýkjörinn formann Framsóknarflokksins, með sér og Bendikt Sigurðarson sem var aðstoðarmaður hans. Sama messan var flutt og varð ekki betur séð en hún hefði haft áhrif á báða þessa ungu stjórnmálaforingja. Greiddu þingmenn beggja þessara flokka atkvæði gegn frumvörpum um að heimila tvo fyrri samningana en þessar atkvæðagreiðslur fóru fram á Alþingi 24. ágúst og 30. desember 2009.

Hins vegar studdu flestir þingmenn Sjálfstæðisflokksins síðasta samninginn sem um þetta var gerður í desember 2010. Það þótti mér dapurlegt að sjá.“