Ritstjóri Herðubreiðar 15/06/2015

Íslenskur aðall, taka 2: Útgerðarmenn fá meiri afslátt af makrílkvóta en eldri borgararar í sundlaugunum

Verði makrílfrumvarp ríkisstjórnarinnar að veruleika verða eigendum 25 skipa afhent 95 prósent makrílkvótans. Ekki á markaðsverði, heldur gjafverði.Makríll

Þetta er niðurstaða Kristins H. Gunnarssonar í pistli í gær.

Kristinn minnir á, að þegar makríll fór að finnast hér við land í umtalsverðu magni hafi einungis eigendur uppsjávarveiðiskipa haft möguleika á að veiða hann. Vegna óvissu um framhaldið hafi aðrir ekki getað fjárfest og komist þannig inn í veiðarnar.

Útgerðarfyrirtækin, sem nú standi til að afhenda kvótann, hafi því „valið sig sjálf.“ Hreinn hagnaður af veiðununum sé um 7,5 milljarðar á ári, en gjald fyrir kvótann þannig, að „þessi ríka stétt manna fær meiri afslátt frá markaðsverði en fátækir og tekjulausir aldraðir fá í sundlaugar landsins.“

Kristinn bætir við:

„Það er aðeins til ein eðlileg lausn á úthlutun makrílkvóta. Kvótinn verður markaðsvara um leið og kvótasetning hefur verið lögfest. Bjóðendur munu verðleggja kvótann og það verð verður greitt. Eina skynsamlega löggjöfin er að bjóða veiðiréttindin út á markaði. Það tryggir ríkinu rétt verð á hverjum tíma og knýr fram samkeppni milli útgerðarmanna. Samkeppnin ræður því hverjir standa sig sem útgerðarmenn. Þetta er leiðin sem farin er í öðrum atvinnugreinum. Boðnar eru út framkvæmdir í vegagerð, mötuneytisrekstur og skúringar fyrir opinbera aðila svo dæmi séu nefnd. Útgerðarmönnum er engin vorkunn að búa við samkeppni.“

Sjá pistil Kristins hér.

Flokkun : Efst á baugi
0,889