trusted online casino malaysia
Úlfar Þormóðsson 05/04/2015

Íslands horfnu hús

 

Eins og þeir þekkja sem unnið hafa við ferðamennsku er fátt ömurlegra en að þurfa að fara með bílfarma af túristum að tilbúnum forminjum. Flestir ferðalangarnir skynja lágkúruna sem þessu fylgir og glotta yfir fyrirlitninguna til þess að dylja vonbrigði sín yfir gabbinu.

Fyrir þremur og hálfu ári trommaði trénaður starfsmaður stærsta ferðafélags landsins fram með þá hugmynd að reisa nýja miðaldakirkju í Skálholti til þess að sýna erlendum ferðamönnum. Þrátt fyrir fögnuð Moggans og þjóðkirkjunnar sofnaði hugmyndin út af vegna þekkingar starfsfólks ferðaþjónustunnar á því hvað boðlegt er og hvað ekki.

Miðilsfundur

 

En tréhestafélagið lætur ekki að sér hæða. Það lagðist undir nýjan foraldarfeld úr gerviefnum þegar ljóst var að ekkert yrði úr kirkjusmíðinni. Þar lá það uns hugmynd laust niður. Þá reis það upp í krafti síns anda og birtist landsmönnum í sjónvarpi og blöðum á (saur)bökkum Ölfusár á vordægri, 20. mars síðast liðinn. Þar opinberaði það nýja hugmynd til þess að svekkja erlenda ferðamenn. Eðlilega var Sigmundur Davíð þarna kominn ásamt öðrum ráðherrum úr ríkisstjórninni og þingmönnum kjördæmis.

Þarna var upplýst um ætlan félagsins: Að beina athyglinni að Selfossi með því að reisa þar nýjan miðaldamiðbæ úr Íslands horfnu húsum, auk torfbæjar og miðaldakirkju og fullyrtu tréhestarnir að þetta muni draga að mikið af ferðamönnum. Kostnaður litlar tvö þúsund miljónir króna, tveir miðjarðar.

Torfbær

Torfbær

„Þetta er algjörlega frábært og mun skipta sköpum“, sagði forsætisráðherra landsins og var svo yfir sig hrifinn af hugmyndinni að hann lýsti því yfir í veislugleðinni að hann gæti alveg hugsað sér að flytja á Selfoss þegar nýi miðbærinn yrði tilbúin eftir tvö ár. Ölvaður af hrifningu flaggaði hann, rúmri viku síðar, framan í þjóðina þingsályktunartillögu um að byggja stúdentagarða við alþingishúsið eftir áratugagamalli teikningu.

Reyndur maður í ferðamannabransanum segir að þar sem svo mikið afl búi að baki hugmyndinni um Íslands horfnu hús verði erfitt að kveða hana niður þótt nauðsynlegt sé ef við ætlum að láta okkur haldast á ferðamönnum. Til þess að draga úr skaðanum íhugar hann að leggja drög að yfirbótaferð fyrir þá sem leiddir verða nauðugir í nýju miðöldina á Selfossi. Fyrsta hugmynd að nafni er Prime Minister inner man. Davíðsstjarna, Eyðibýlið, Lögheimilið eru líka nöfn til athugunar.

Sigmundur Davíð Hofsós

Nöf

 

Þetta yrði hringferð um landið og skiptir engu hvort ferðamenn lenda í Keflavík, eða á væntanlegum alþjóðaflugvöllum á Akureyri og Egilsstöðum. Þeir ferðamenn sem dvelja syðra legðu í ferðina frá hýbýlum ráðherrans í Reykjavík og héldu sem leið liggur norður að Nöf á Hofsósi þar sem sumarhús ráðherrans er. Þaðan yrði haldið austur með landi að eyðibýlinu Hrafnabjörgum III í Jökulsárhlíð á Fljótsdalshéraði þar sem ráðherrann á lögheimili. Ferðinni lyki  við Alþingishúsið. Í eftirvæntingu.

Latest posts by Úlfar Þormóðsson (see all)
Flokkun : Efst á baugi
1,385