Illugi ákvað sjálfur að Orka Energy yrði hluti af samkomulagi Íslands og Kína

„Það var aldrei hugsunin að fulltrúar frá Orku Energy eða Marel ættu að vera í sendinefndinni, en fulltrúar þessara fyrirtækja voru staddir í Peking á þessum tíma.“

Þetta sagði Illugi Gunnarsson menntamálaráðherra í viðtali við Fréttablaðið hinn 9. október síðastliðinn, aðspurður hvernig það kom til að fulltrúar Orku Energy voru hluti af sendinefnd Íslands í heimsókn til Kína fyrr á árinu.

Á ummælum hans er að skilja að það hafi verið tilviljun, að fulltrúar Orku Energy voru á staðnum.

Í gögnum sem Stundin hefur aflað hjá menntamálaráðuneytinu og fjallar um hér koma hins vegar fram vísbendingar um allt annað. Í samkomulaginu sem undirritað var í Kína segir meðal annars:

„Til að framkvæma það sem kemur fram í þessu samkomulagi hefur vísinda- og tækniráðuneyti Kína ákveðið að skipa SINOPEC Star Petroleum Co. Ltd, sem fulltrúa Kína, og menntamálaráðuneyti Íslands hefur skipað Orkustofnun, opinbers orkufyrirtækis á Íslandi, ásamt Orku Energy Energy Ltd. til að vera fulltrúa  Íslands.“

Ráðuneytið ákvað með öðrum orðum að Orka Energy yrði hluti af opinberum samningi Íslands og Kína, þ.e. það fyrirtækið yrði fulltrúi Íslands.

Orka Energy hafði áður gert samninga í Kína, en aldrei fyrr sem hluti af opinberum samningi ríkjanna tveggja eða fulltrúi íslenska ríkisins.

Marel átti einnig fulltrúa á fundinum, en kemur hvergi við sögu í hinu opinbera samkomulagi ríkjanna tveggja.