Úlfar Þormóðsson 10/11/2015

Í drottins nafni og 40

Eins og flestir vita er hægt að reikna eitt og sama dæmið með ólíkum aðferðum og fá breytilega útkomu. Þessa dagana dundar eftirlaunaklerkurinn Þórir Stephensen sér við að reikna út hversu mikið ríkissjóður leggi til „þjóðkirkjunnar“. Hann sleppir launum presta upp á 1 miljarð 507,6 miljónir, sem greidd eru úr ríkissjóði, einnig greiðslum í jöfnunarsjóð sókna 353,5 miljónir. Hann sleppir líka kirkjugarðsgjaldi upp á 997,6 miljónir og sóknargjöldum upp á 1 miljarð 910,7 miljónir króna, en þau eru innheimt af ríkinu og skilað til kirkjunnar og telur það ekki sem framlag og hefur rétt fyrir sér í því, nema sem snýr að því, að það kemst enginn undan því að greiða þá upphæð því að hún er bundin í lög. Loks nefnir hann kirkjumálasjóð, kristnisjóð og stofnframlag til fjögurra höfuðkirkna, samtals upp á 366,2 miljónir króna og telur það eina framlag til kirkjunnar sem greitt sé úr ríkissjóði.

Kern_Arion_auf_dem_Delphin

Þetta er sum sé hákristileg reikniformúla. Eðlilega veit ég ekkert um heilagleika hennar, en leyfi mér þó að efast.

Þegar ég hafði litið yfir talnaflóð klerks vaknaði hjá mér löngun; ef ekki þrá. Mig blóðlangaði allt í einu til þess að biðja kirkjunnar menn um að tíunda þær jarðir sem „jarðasamkomulag“ kirkju og ríkis byggir á og er grundvöllurinn undir launagreiðslum til trúboðanna. Og geri það hér með. Til þess að upptalning jarðanna sé trúverðug þyrfti að fylgja hvernig kirkjan eignaðist viðkomandi jörð; keypt af hverjum og á hvaða verði ef um það var að ræða, hver gaf henni hana ef um gjöf var að ræða, hvenær gjöfin var gefin, við hvaða kringumstæður og hver hafi vottað gjörninginn svo að ljóst sé að enginn deyjandi hafi verið beittur þrýstingi eða honum lofað fyrirgefningu syndanna ellegar einhverju álitlegu í framhaldslífinu fyrir jarðarskikann. Þetta er nauðsynlegt til þess að unnt sé að meta hversu traustur grunnur er undir hinni kristilegu reikniformúlu.

Svo óska ég, kirkjulaus maðurinn, eftir áliti launaðra trúboða „þjóðkirkjunnar“ á þeirri tillögu sem ég ætla nú að velta út í samfélagið og hljóðar svo í dottins nafni og fjörutíu:

Ríkið hætti að innheimta félagsgjöld fyrir trúfélög. Þeim sé þó heimilt að leggja gjöld á félaga sína líkt og önnur hagsmunafélög gera og rukka þau sjálf … gegn kvittun.

Þarna er sum sé álitleg skattalækkunartillaga á ferðinni.

Annað ekki. Amen eftir efninu.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,752