Úlfar Þormóðsson 14/03/2017

Hvurslags eiginlega er þetta?

Iðnó er annað og meira en hús. Það er hugtak sem er til komið vegna þess lífs sem þar hefur verið lifað, sögunnar sem það geymir, vegna fólksins sem þar hefur starfað að hugðarefnum sínum. Iðnó er tákn um þetta allt og ótalmargt annað.

Fundur í IðnóOg nú hefur það gerst að, konan sem hefur haldið lífi í Iðnó, konan sem blés nýju lífi í Iðnó þegar LR flutti þaðan, hún Magga Rósa, sem enn heldur lífinu í hugtakinu og tákninu, hún á að víkja eftir 16 ára glæsilegan rekstur. Hún á að fara burt úr Iðnó, ekki af eigin hvötum, hvorki að ósk þeirra sem húsið nýta né okkar hinna sem sækjum staðinn. Henni bera að víkja að boði nefndar sem starfar á vegum Reykjavíkurborgar.

Eftir því sem mér skilst var henni tilkynnt þetta í gær (13.03.´17) eða fyrradag. Bréflega. Án útskýringa. Og hvorki takk né éttu það sem úti frýs. Bara þetta; umsókn þinni um frekari rekstur er hafnað; við ætlum að velja annan; þú ferð fyrir 1. október, við ráðum, nefndin.

Og nú spyr margurinn:

Hvað gerði Magga Rósa rangt? Af hverju fær hún ekki að halda blómlegum rekstri hússins áfram? Hver á þá umsókn sem lofar svo miklu meiru en því sem Magga Rósa hefur hrint fram í Iðnó við Tjörnina?

Gæti það verið vegna leigugjalds? Er þetta krónuspursmál? Eða er frændi á ferð? Frænka? Hvað er ræður?

Svariði! Og það strax.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,845