trusted online casino malaysia
Úlfar Þormóðsson 17/04/2015

Hvellur

 

Rannveig Rist, forstjóri Rio Tinto Alcan á Íslandi, er í stjórn HB Granda. Samkvæmt Eyjunni.is sitja þar einnig þau Þorsteinn Víglundsson, framkvæmdastjóri Samtaka atvinnulífsins, og Harpa Ólafsdóttir, forstöðumaður kjaramálasviðs verkalýðsfélagsins Eflingar. Stjórnin þarf ekki að standa í kjaradeilu til þess að fá launahækkun. Stjórnarmenn ákveða sjálfir laun sín og hækkuðu þau um 33% á dögunum. Slík gjörð nefnist sjálftaka.

kárahnjúkar kaffistofa

 

Þetta spurðist út og olli uppnámi. Rannveig forstjóri fékk bakþanka þegar hún frétti af fjaðrafokinu og sendi fjölmiðlum yfirlýsingu um að hún tæki ekki við hækkuninni sem hún hafði samþykkt; sagði hana úr takti við stöðu kjaramála á Íslandi.

Ætli maðurinn megi spyrja sjálfan sig hvort þetta hafi verið vinsældartrikk (poppúlismi) hjá konunni eða hvort hún hafi gert þetta vegna samkenndar með fiskverkunarfólkinu í Granda?  Samkvæmt Tekjublaði Frjálsrar verslunar var Rannveig sjötti launahæsti forstjóri landsins, með tæplega 6,3 milljónir króna á mánuði árið 2013.

Tvær fiskverkakonur voru í Kastljósi í gærkveldi. Mánaðarlaun þeirra með bónusum eru á bilinu 240 – 260 þúsund. Það er sama upphæð og Rannveig forstjóri fær fyrir að sitja stjórnarfund eftir hækkun. Ef maðurinn gefur sér að kynsystur hennar hafi haft 200 þúsund í mánaðarlaun árið 2013 hefðu þær þurft að vinna í fiski í 31 og ½ mánuð til þess að ná upp í ein mánaðarlaun Rannveigar.

Í dag hefur Fréttablaðið eftir forsætisráðherra að „tugprósenta hækkun stjórnarlauna“ séu „kolröng skilaboð inn í samfélagið á þessum tíma“. Öllum mönnum, þar með talið forsætisráðherra sjálfum, hefur reynst erfitt að átta sig á meiningu orða ráðherrans. Hér verður þó gerð tilraun til þess að skilja orðin „á þessum tíma“ því að merking þeirra virðist augljós. Þau tákna augljóslega að honum finnist að það þurfti að hækka stjórnarlaunin, en bara ekki núna. Stjórnin hefði átt að gera þetta áður en kjarasamningagerð við verkalýðinn hóst eða að bíða með hækkunina fram yfir undirritun samninga. Þetta finnst honum. Forsætisráðherranum.

Nágranna minn vantaði smið til verka og hringi í meistara nú í morgun, 17.04. 2015. Hann kvaðst hugsanlega geta sinnt grannanum í haust. Nú væri hann að reisa fimm hæða blokk og væri sjálfur í vandræðum. Hann fengi ekki nógu marga innlenda smiði og yrði að grípa til þess að flytja Pólverja til landsins.

Í hádegisfréttum Ríkisútvarpsins sem lauk rétt í þessu var í lögnu máli vitnað til spádóma greiningardeildar eins banka og borin saman við spá samskonar deildar annars banka sem útvarpið greindi víst frá í gær. Þeir eru semsagt aftur komir á kreik og fá inni í öllum fjölmiðlum, spámennirnir, banksterarnir.

Kannski er ég einn um það. Segi það samt: Þessir atburðir, ásamt mörgum öðrum teiknum, ber vott um nýja bólumyndun, þenslu og hvell. Nýtt hrun. Og mér finnst ekki við hæfi að við sitjum með hendur í klofi undir lofi um hagsældina sem sögð er bíða okkar handan við hornið því að við vitum af reynslunni, ættum að vita, til hvers það leiðir.

 

Latest posts by Úlfar Þormóðsson (see all)
Flokkun : Efst á baugi
1,360