Hvar er fíflið í stofunni?
“Fíllinn í stofunni er Ríkisútvarpið”, sagði Óli Björn Kárason, alþingismaður Sjálfstæðisflokksins í þingræðu á dögunum og endurtekur það í dag (31.01.´18) í grein í “frjálsa” fjölmiðlinum Morgunblaðinu þar sem hann er enn og aftur að fjalla um rekstrarvanda “frjálsra” fjölmiðla og lýsa þeirri ímyndun sínum að vandi þeirra stafi af styrk Ríkisútvarpsins.
Það er einkenni djúpúðgra manna að vitna í sjálfa sig. Það gerir Óli Björn að sjálfsögðu og hleypir okkur inn í forna spekigrein. Þar er þetta:
“Í grein sem birtist í tímaritinu Þjóðmálum árið 2010 lagði ég til að spilin væru stokkuð upp – hlutverk Ríkisútvarpsins yrði sniðið að breyttum aðstæðum. „Nýtt Ríkisútvarp“ hætti allri dagskrárgerð fyrir utan að reka fréttastofu. Allt dagskrárefni útvarps og sjónvarps verði keypt af sjálfstæðum framleiðendum, fyrir utan kaup á hágæða erlendu efni.
Við Íslendingar eigum ótrúlega hæfileikaríkt fólk á öllum sviðum lista og menningar. En við erum að sóa fjármunum og nýtum því hæfileikana ekki.
Tillögur um samkeppnissjóð og/eða útvistun alls dagskrárefnis utan frétta miða að því að nýta fjármuni betur og efla dagskrárgerð og almenna fjölmiðlun. Í áðurnefndri Þjóðmálagrein var fullyrt að allt þjóðfélagið myndi krauma ef hugmyndir af þessu tagi næðu fram að ganga:
„Við munum leysa úr læðingi krafta og hugmyndasköpun sem auðgar íslenskt menningar- og viðskiptalíf langt umfram drauma. Íslendingar verða í sérflokki þegar kemur að listum og menningu. Engin þjóð í heiminum mun verja jafnmiklum fjármunum með beinum hætti til lista og menningar og varðveislu eigin sögu og tungu. Við munum sjá sprengingu sem á sér vart líka og skapa áður óþekkt skilyrði fyrir fullhuga á öllum sviðum sköpunar. Best af öllu er að þjóðfélagið allt verður skemmtilegra.“
Þegar saman lýstur djúpu viti og lítilli þekkingu verður útkoman oft skondin eins og þarna sést. Við lesturinn vakna svo vitlausar spurningar að það er ekki hægt að leggja þær fram. Utan eina. Hún er þessi með skýringum:
Mannvitsbrekkur segja að “frjálsir” fjölmiðlar séu svo fjárvana að þeir þurfi ríkisaðstoð til þess að lifa af. Því er spurt: Eftir að “hinir frjálsu” hafa skilið hvað Óli Björn leggur til, og vilja láta til skarar skríða, hvernig og með hverju eiga þeir þá, staurblankir, að greiða fyrir “Allt dagskrárefni útvarps og sjónvarps … fyrir utan kaup á hágæða erlendu efni”?
- Sálumessa - 02/07/2020
- Umhverfisvændi - 21/04/2020
- Er brennivínið besti kostur? - 26/03/2020