Hvar er byssan mín?

Það er áreiðanlega ósatt að Björn Bjarnason, fyrrverandi ráðherra leiki sér að tindátum með völdum mönnum úr Varðbergi. Hitt er satt að Björn vill láta líta svo út að hann sé afar fróður um stríð og frið, her og Herrann sjálfan. Til þess að viðhalda þessari ímynd skrifar hann reglulega um þessi efni.

Í miðopnu Morgunblaðsins í dag, 25.08.´17, er mikil grein eftir Björn um hermál og Nató, og Rússa og Kanadamenn og hershöfðingja og Trump og fleira og fleira. Greinin er ekki skrifuð af manni sem leikur sér að tindátum; höfundurinn er alvörunnar maður sem les landakort og skýrslur og ræður herforingja um endurnýjun vopna og árásargirni Rússa og múslima og annarra vondra manna. Eftir lestur greinarinnar er auðvelt að ímynda sér að Björn hafi yfirgripsmikla þekkingu á hverju því sem lítur að hermálum. Til dæmis á hergagnaframleiðslu. Og endurnýjun vopna, herskipa og herflugvéla. Þess vegna hlýtur hann að vera maðurinn sem getur svartað spurningum, spurningum sem sjaldan eru orðaðar en liggja þeim mun þéttar í loftinu. Hér eru nokkrar:

Björn, hvað verður um allar úreltu herflugvélarnar?

Björn, hvað verður um öll úreltu flugmóðurskipin?

Björn, hvað verður um úreltu byssurnar og skotin í þær?

Björn, hvað verður um langdrægu flaugarnar þegar flygildin (drónarnir) fara að sendast með helsprengjurnar fyrir ykkur?

Og svo í lokin:

Björn, hvaðan fá þróunarlöndin og uppivöðslumenn þjóðanna vopn og verjur?