Ritstjóri Herðubreiðar 28/02/2016

Hvað með nærbuxurnar?

Ég fékk ekki betur séð en nærbuxurnar sem meðlimir (allir nema einn) Reykjavíkurdætra klæddust í umtöluðu atriði hjá Gísla Marteini, hafi verið „Eign Ríkisspítalanna“ og þar með okkar skattgreiðenda!Guðmundur Brynjólfsson

Eru listamannalaunin ekki nóg í kjaftinn á þessu liði svo það darki nú ekki um í nærbuxum frá manni – og það í sjónvarpi, allra landsmanna. Enn sem komið er.

Hvernig er komið í þjóðfélaginu þegar ungar konur á besta aldri sem gjaldgengar eru til allra almennra láglaunastarfa sjá sig knúnar til að stela nærbuxum á Ríkisspítölunum? Og hvað með sjúklingana? -sem í gær skulfu naktir undir dúnlausum sængum inni á mygluðum sjúkrastofum vegna þess að einhverjar gólandi dræsur voru komnar í nærbuxurnar af þeim – og alla leið upp í Sjónvarp. Og flensan í botni!

Finnst fólki þetta allt í lagi?

Ég er ekki hneykslunargjarn maður en mér finnst það fyrir neðan allar hellur að Ríkisspítalarnir skuli ekki fá að hafa nærbuxurnar í friði! En, maður sér svo sem í gegnum plottið, maður sér að einkavæðingaröflin í landinu standa á bakvið þessar rappdúkkur því næsti leikur verður auðvitað sá að benda á, að sjúkrahúsi sem ekki haldist á nærbuxum sé betur komið í höndum einkaaðila, því eins og kunnugt er þá eru einkaaðilar betur til þess fallnir að vera með sínar nærbuxur á hreinu (kannski ekki hreinar) en þetta sósíalistapakk sem finnst rétt að allir spóki sig um í sömu brókunum; óháð stétt og stöðu. Því þarf aðkoma Gísla Marteins að þessari uppákomu (mér liggur við að segja, uppáferð) ekki að koma á óvart.

Að lokum, já maður verður að hætta þótt manni sé brugðið (ekki getur maður gengið út), ætlast þessar rappandi dömur, í hvítum nærbuxum, til þess að Þvotthús Landspítalans þvoi rappförin úr baðmullarbrókunum fyrir næstu tónleika? Er það meiningin? Að hallarekstri Landspítalans verði stefnt fyrir efnahagsleg björg með aukaþvotti og sérhagsmunadekri? Er ekki heilbrigðiskerfið nógu illa statt fjárhagslega? Heldur fólk að Kári Stefánsson sé að standa í þessu svo Reykjavíkurdætur geti smánað landsmenn í þjófstolnum nærbuxum, otandi gervitittlingi framan í holdgerving gervimennskunnar – og okkur hin, sem vorum bara að bíða eftir því að Barnaby gæti byrjað að ráða gátuna?

Guðmundur Brynjólfsson, Hringbraut, 27. febrúar 2016

 

0,772