Hvað heldur þú? Jólaleikur ársins

 

Af hverju hefur fátækum fjölgað á Íslandi? Ef hverju þurfa fleiri hjálp til þess að eiga fyrir mat og húsaleigu? Af hverju verða ríkir menn ríkari? Af hverju var matarskattur hækkaður og innflutningstollar af lúxusvöru felldir niður? Er þetta vegna þess að ráðherra ríkisstjórnarinnar eru að endurgjalda þeim sem veittu þeim peningastyrki og aðra ógreinda aðstoð við að ná kjöri í síðustu kosningum? Eða hvað? Hvað heldur þú?

Hvers vegna hefur launadeila lækna dregist svo mjög úr hömlu? Hvernig stendur á því að starfsfólk Landsspítalans veikist af völdum myglusvepps? Hvers vegna eru læknatæki á spítölum úti um allt land úrelt og ónýt sum? Hvers vegna liggja sjúklingar á göngum og jafnvel salernum spítala? Hvers vegna er biðlisti eftir lækningu og sjúkrahúsvist? Hvers vegna er ekki til nóg af lyfjum á sjúkrahúsum landsins? Er það vegna þess að ríkisstjórnin vil méla heilbrigðiskerfið eins og það er og einkavæða það? Eða hvað? Hvað heldur þú?

Af hverju var aðgangur fullorðinna að skólakerfinu takmarkaður? Af hverju var söluskattur af bókum hækkaður? Er það vegna þess að mennt er máttur? Hræðast ráðherrar þekkingu annarra? Eða hvað? Hvað heldur þú?

Af hverju er verið að flytja stofnanir með manni og mús norður í land þeim til óþurftar og í óþökk starfsmanna? Er það vinargreiði ráðherra við vildarmenn? Er það vegna þess að Kaupfélag Skagfirðinga keypti jörð undir framsóknarmann í Borgarfirði og komið að skuldadögum. Eða hvað? Hvað heldur þú?

Af hverju vegur sameinuð ríkisstjórn að Ríkisútvarpinu? Er það vegna þess að þar eru sagðar óþægilegar fréttir af gjörðum hennar og afleiðingum þeirra? Er það vegna þess hve illa máli farnir margir talsmenn stjórnarinnar eru og verða að athlægi þegar þeir þurfa að svara spurningum „í beinni“ og hafa ekki milli handanna texta skrifaðan af öðrum? Eða er það vegna þess að þeir ætla að stofna Útvarp Framsókn, Útvarp Sjálfstæðis og þurfa pláss á markaði? Eða hvað. Hvað heldur þú?

 

Á jólaboðsleik ársins er hvorki einkaréttur, virðisauki né höfundarréttargjald. Hann er frjáls, háður sjálfum þér, vinum þínum og kunningjum. Og öllum er heimilt að bæta við hann spurningum og jafn mörgum leyfist að leita svara.

Gleðileg jólaboð!