Húsaskjól

Sífellt fleiri Sandgerðingar missa eignir sínar til Íbúðalánasjóðs. Fjöldi íbúða þar syðra liggur undir skemmdum og jafnvel getur farið svo að rífa þurfi sumar þeirra. Íbúðalánasjóður á nú 90 íbúðir í bænum, eða um 16%. Og það er skortur á leiguhúsnæði í Sandgerði og íbúum fækkar af þeim sökum þrátt fyrir næga atvinnu.  Um 50 íbúðir í Sandgerði af 90 í eigu sjóðsins standa auðar. Þær munu vera að grotna niður. Bæjarstjórinn hefur látið hafa það eftir sér að sumar íbúðirnar séu það illa farnar að það þurfi hugsanlega að rífa þær.

Um helgina greindi Ríkisútvarpið frá þessu og innti forsvarsmenn sjóðsins efir ástæðum þessa. Í svari rekstrarsviðs sjóðsins kom fram „að fylgst sé með eignunum eftir föngum og reynt að koma í veg fyrir að þær skemmist. Almennt sé lagt upp með að selja húsnæði í því ástandi sem það er og mikil áhersla sé lögð á að selja eignir sjóðsins. Nokkuð sé þó um að húsnæði, einkum á erfiðum markaðssvæðum, hafi staðið autt í nokkurn tíma og ástand þess sé slæmt. Það sé þó allt til sölu. Ekki hefur verið litið svo á að sjóðurinn ætti að leggja í mikinn kostnað við endurbætur á húsnæði þar sem slíkt er ekki talið samræmast hlutverki hans.

Það er merkileg yfirlýsing ef rétt er að sjóðurinn skuli ekki halda skikkanlega við því húsnæði sem hann eignast. Það merkir í reynd að hann skuli láta það grotna niður. Og hann gerir það. Þá er spurningin hvort starfsmenn sjóðsins lesi rétt úr reglugerðum. Og aðrar andstyggilegri spurningar vakna: Ef þetta er svona er það þá vegna þess að það gerir byggingaverktökum með síbreytilega kennitölu auðveldara fyrir að koma sínum okurbyggingum í verð? Eða er þetta haft svona til þess að létta sterkríkum húseigendum að leigja út íbúðir á yfirverði?

Hvort heldur er þá er ástæða til þess fyrir félagsmálaráðherra að láta málið til sín taka ef hann meinar eitthvað með því að hann vilji auðvelda félitlu fólki að leigja sér húsnæði á viðráðanlegu verði eða eignast það. Umrætt húsnæði er í eigu hins opinbera. Það er sameign okkar. Og yfirgæslumaður þess er umræddur ráðherra.

Eftirskrift: 

Á fimmta tímanum í dag birtir Pressan frétt um að það sem af er ári hafi Íbúðalánasjóður selt 772 eignir og að sala á 114 íbúðum til viðbótar sé langt komin. Í gær voru samþykkt kauptilboð í 18 fasteignir í eigu sjóðsins. Nú eru ríflega 1.400 eignir óseldar. Síðan segir orðrétt:

„Langflestar sölurnar á stökum íbúðum og húsum fara fram í gegnum fasteignasölur. Um ræðir 472 slíkar stakar sölur til nýrra eigenda á þessu ári. 300 eignir hafa verið seldar fleiri saman í pakka það sem af er ári, yfirleitt til leigufélaga.“

Þrátt fyrir þessa „pakkasölu“ er enn skortur á leiguhúsnæði, það er að segja á viðráðanlegu verði fyrir launafólk.