Úlfar Þormóðsson 21/07/2016

Huldufólk

Bæjarráð Mosfellsbæjar hefur úthlutað íslensk skráða félaginu MCPB ehf, lóð undir 30 þúsund fermetra einkaspítala ásamt 5 stjörnu hóteli. Gert er ráð fyrir að spítalinn verði með um það bil 150 eins manns sjúkraherbergi og 5 skurðstofur; hótelið með um 250 til 300 herbergjum. Ætlunin er að hjúkra hjartveikaum offitusjúklingum, erlendum, sem hafa efni á dulitlum lúxus á lífsbrautinni.

Peningar, auðmenn

MCPB ehf er að 98% í eigu hollenska félagsins Burbanks Holdings, 1% eigu íslensks lögmanns og 1% á gröfufyrirtæki í Hafnarfirði. Í  hádegisfréttum Rúv (21.07.´16) var nafngreindur hollenskur bankamaður sem sagður var eiga 51% hlut í Burbanks Holdings. Haft var eftir honum að 49% hlutur væri í eigu lokaðs fjárfestingasjóðs, sem holensk lög banna að upplýst sé hverjir eiga.

Þetta eru á margan hátt athyglisverð tíðindi. Til dæmis  í kjölfar frétta Sjónvarpsins frá því í gær af því að skattsvikarar heimsins hafi í verulegum mæli hætt við að fela peningana sína á Jómfrúreyjum og flutt þá á lögverndaða leynireikninga í Hollandi og Lúxusborg til þess að losna við að borga af þeim skatt.

Hvorki hefur pistlahöfundur vit né þekkingu til þess að dæma um læknisfræðilegt gildi þessarar risaframkvæmdar né áhrif hennar á íslenskt samfélag. Um það verður því ekkert sagt hér að svo komnu máli, aðeins varpað fram tvíliða spurningu:

Hvers vegna í ósköpunum leyfa íslensk yfirvöld huldumönnum að fjárfesta hérlendis með peningum sem enginn veit úr hvaða vasa koma; eru engin lög í landinu sem koma í veg fyrir leyndarhyggju af þessu tagi?

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,893