Karl Th. Birgisson 26/08/2014

Hrukkótt innísér

Mér líður eins og Úlfari Þormóðssyni: Ég fæ ekki frið fyrir sjáFáninnlfum mér.

Ég lít út um gluggann og sé þetta:

Forsætisráðherra lýðveldisins delerar um sterakjöt og útlenzkar veirur sem gera okkur klikkuð. Þetta hlusta ég á í fréttunum um leið og ég kyngi spænsku hakki frá Íslandsnauti.

Þegar eftirlitsstofnun þingsins spyr ráðherrann einfaldra spurninga svarar hann með skætingi og hótfyndni. Ég heyri „Hohoho“ djúpri röddu á meðan hann skrifar dissið á stjórnkerfisheilbrigðiseftirlitið. Gott á þennan þarna tryg49@hotmail.com.

Forsætisráðherrann flytur ekki ræðu án þess að aðstoðarmennirnir þurfi að eyða næstu dögum í að leiðrétta og/eða útskýra að hann hafi nú ekki meint það sem hann sagði. Eða sagt það sem hann meinti. Eða eitthvað.

Formaður fjárlaganefndar er varla kominn úr sumarfríi þegar hún byrjar að þrugla, um æviráðna embættismenn og sitthvað fleira sem fyllir síðan heilu fréttatímana að draga til baka.

Við erum ekki að tala um skoðanir. Nei. Bara einfaldar staðreyndir, sem þau segjast fara með, en eru hrein þvæla. Þær væri allar hægt að gúggla. Þeim er alveg sama.

Sjálfstæðisflokkurinn lítur á stjórnkerfið sem fótboltavöll þar sem gilda prívatreglur hans. Þau þykjast eiga bæði leikvanginn og boltann frá því í gamla, gamla daga.

(„Skilaðu lyklunum, Jóhanna.“ – Bjarni Ben.)

Fjármálaráðherrann þarf ekki að lesa tímamótabréf frá umboðsmanni alþingis til að vita að ekkert er að marka það. Honum er alveg sama.

Aumkunarverðar leifarnar af innanríkisráðherranum eru annaðhvort siðblindar eða síljúgandi.

Yfir öllu vomar svo hinn dragúldni draugur flokksins, með þungan andardráttinn ofan í hálsmál nýja formannsins, sem finnur daglega lykt af gamalli eimyrju.

Oj.

———-

Ég gæti auðvitað farið að dæmi Tómasar og hljóður dregið tjöldin fyrir gluggann.

Það er samt ekki hægt. Ég finn alltaf fyrir Úlfari og fæ ekki frið fyrir sjálfum mér.

Þeir sem hafa hitt Úlfar Þormóðsson nýlega vita að hann er sjötugur hrukkóttur kall.

Það er of mikið lagt á eitt lýðveldi – af einni tímabundinni ríkisstjórn – að því líði þannig.

Sjötugt. Og krumpað innísér.

0,867