trusted online casino malaysia
Úlfar Þormóðsson 12/01/2016

„Hraðasta kjarabótin“

Boðað hefur verið til neyðarfundar vegna bágrar fjárhagsstöðu hjúkrunarheimila fyrir aldraða. Ríkið hefur ekki gert þjónustusamning við hjúkrunarheimilin þrátt fyrir lögbundna skyldu. Á fimmta tug hjúkrunarheimila eru í landinu og annast sveitarfélögin rekstur flestra þeirra. Í síðasta mánuði þurftu stjórnendur heimilanna að fara þess á leit við ríkið að það greiddi fyrirfram janúargreiðslu til heimilanna svo hægt væri að borga starfsmönnum kaup á réttum tíma.

Millifærslan

„Þetta er svona milljarður til einn og hálfur milljarður á ári sem vantar í þennan rekstur,“ hafði Ríkisútvarpið í gærkveldi (11.01. ´16) eftir formanni samtaka fyrirtækja í velferðarþjónustu. Vegna sleifarlags hins opinbera hafa sveitarstjórnarmenn velt því fyrir sér að skila rekstri hjúkrunarheimilanna til ríkisins. Garðabær er þar á meðal. En vanþóknun vegna frammistöðu ríkisins er ekki staðbundin. Í gærkveldi komu 400 manns saman á Hvolvelli, héldu fund með framkvæmdastjórn Heilbrigðisstofnunar Suðurlands og lýstu megnri óánægju með skerta þjónustu heilsugæslustöðvarinnar.

Biðlistar eftir dvöl á hjúkrunarheimilum lengjast rétt eins og listar eftir  margs konar öðrum aðgerðum. Samkvæmt tölum frá október síðastliðnum bíða 3.895 eftir aðgerð á augasteini, 523 eftir mjaðmaliðaskiptum og 844 eftir hnjáliðaskiptum, en samtals bíða 5.987 manns eftir breytilegum aðgerðum. 80% þeirra sem bíða, hafa beðið lengur en í þrjá mánuði, sem er viðmið landlæknis um hámark biðtíma. Eðli málsins samkvæmt er stór hluti þeirra sem bíða eldriborgarar. Í þessum tölum er þó ekki að finna þá sem bíða eftir plássi á hjúkrunarheimilum.

Fjársvelti til hjúkrunarheimila er ekki nýtilkomið. Í ársgamalli skýrslu Ríkisendurskoðunar kom fram að hjúkrunarheimilin vanti milljarð til viðbótar frá ríkinu til að endar nái saman. Ein ástæða fyrir fjárskortinum er sú að ekki hefur verið gerður þjónustusamningur milli ríkis og sveitarfélaga eins og lög gera ráð fyrir. Í svefnrofum í nóvember lagði heilbrigðisráðherra fram skriflegt svar við fyrirspurn á Alþingi. Þar sagði að vinnunni við samningsgerðina miðaði vel og að þjónustusamningurinn yrði væntanlega kynntur fyrir áramót. Það varð ekki.

Þegar framangreindar staðreyndir blasa við er vert velta fyrir sér trúverðugleika orðanna og rifja það jafnframt upp að fyrir rúmum mánuði síðan, eða þann þriðja desember síðast liðinn, sagði forsætisráðherra í umræðu um velferðarmálin, að elli og örorkulífeyrisþegar væru að fá hröðustu kjarabót sem um getur í áratugi.

Til hamingju, Ísland. Úti er alltaf að snjóa.

Latest posts by Úlfar Þormóðsson (see all)
Flokkun : Efst á baugi
1,345