Ritstjóri Herðubreiðar 15/04/2014

Höfðu milljónir upp úr gjaldtöku við Geysi. Krefjast tryggingar frá ríkinu vegna „hagnaðarmissis“

Landeigendur við Geysi rukkuðu ferðafólk um aðgang að svæðinu í um það bil einn mánuð þangað til fallist var á lögbannskröfu ríkisins og gjaldtöku hætt í gær.Geysir

Ekki liggja fyrir tölur um hversu margir heimsóttu Geysissvæðið á þessum tíma, en landeigendur sjálfir gera ráð fyrir að þangað komi 600 þúsund ferðamenn á þessu ári. Það eru 50 þúsund manns á mánuði að meðaltali, en flestir koma þó yfir sumarmánuðina.

Gjaldið var sex hundruð krónur. Ef gert er ráð fyrir að helmingur meðaltalsins, 25 þúsund manns, hafi heimsótt svæðið þann tíma sem gjaldtakan stóð hafa landeigendur haft 15 milljónir upp úr krafsinu. Hafi þeir verið fleiri er talan hærri sem því nemur.

Í greinargerð landeigenda í lögbannsmálinu segir, að verði lögbannið staðfest (eins og nú hefur gerst) þá krefjist „gerðarþoli [landeigendur] að gerðarbeiðanda [ríkinu] verði gert að setja fram tryggingu fyrir annars vegar þeim kostnaði sem gerðarþoli hefur þegar undirgengist með skuldbindingum og eins þeim hagnaðarmissi sem hann verður fyrir með setningu lögbannsins. Áskilinn er réttur til að setja þessar kröfur fram með skýrari hætti á seinni stigum málsins, ef þörf krefur.“

Flokkun : Efst á baugi
0,785