Hjálp í viðlögum
Það er illt þegar öfundargenin stýra hugsun manna og framgöngu. Dæmi um þetta má sjá af skrifum á tölvuskjá í morgun, 27.02.´17, eftir einhvern johannpall@stundin.is, hvað svo sem hann heitir réttu nafni í þjóðskránni. Í skrifunum ræðst hann með lævísum fjandskap að tveimur máttarstólpum samfélagsins og eiginkonu annars þeirra.
Hinn öfundgjarni segir frá því, eins og einhverri hneisu, að Kristján Þór, menntamálaráðherra hafi í auglýsingaskyni prófað flunkunýtt líkamsmælingatæki sem eiginkona Guðlaugs Þórs, utanríkisráðherra kynnti í sínu eigin fyrirtæki og þeirra hjóna.
Engir ættu að vita það betur en þeir nafnar, Kristján Þór og Guðlaugur Þór, sem báðir hafa verið athafnasamir heilbrigðisráðherrar, að fátt er dýrmætara en góð heilsa á viðráðanlegu verði. Þess vegna er eðlilegt að þeir taki höndum saman og kynni nýjustu tækni sem í boði er til þess að öðlast bestu hugsanlegu hreysti. Og hana er hægt að fá í líkamsræktarstöð Guðlaugs Þórs og konu hans.
johannpall þessi segir að um sé að ræða háþróaða tækni sem mælir samsetningu líkamans og er notað af mörgum virtum heilsustofnunum víða um heim. „Með 30 sekúndna prófi fást niðurstöður um marga mismunandi þætti sem gefa mikilvægar upplýsingar um vöðvamassa, fitu, vatnsmagn, grunnbrennslu og innri fitu. Tækið notar svo tölfræði til að meta ástand þitt miðað við hæð, þyngd, aldur og gefur þér upp líffræðilegan aldur,“ segist hann hafa eftir öðrum.
Það er ljóst af skrifunum að öfundin knýr johannpall og fyrir vikið kemur hann ekki auga á það sem þeir nafnarnir Þór sáu af reynslu sinni og þekkingu: Heimilislæknar verða óþarfir. Það sparar landsmönnum stór fé. Til þess þarf fólk aðeins að kaupa eitt tæki. Nú vita allir hvar það fæst. Og það er búið að prufukeyra það. Af fagmanni.
Á meðan ekki er kunn aðferð til að nema öfundargenið á brott úr manninum skyldi hver og einn hafa varan á þegar hann les og hlustar, því hvarvetna leynast sorapennar og rægitungur sem reyna að láta hið góða líta ill út. Og það var augljós tilgangur johannpall með skrifum sínum. Þeim, sem ekki eru haugfullir af öfund og illgirni, er fullljóst að ekkert er heilbrigðara og eðlilegra en það, að ráðamenn okkar aðstoði hver annan með ráðum og dáð þegar velferð okkar hinna er í húfi. Og stendur okkur til boða. Fyrir slikk.
- Sálumessa - 02/07/2020
- Umhverfisvændi - 21/04/2020
- Er brennivínið besti kostur? - 26/03/2020