Hinir óttaslegnu

Stjórnarflokkarnir telja sig hafa fundið sóknarfæri á andstöðuna í tillögu borgarstjórnar Reykjavíkur um að sniðganga vörur frá Ísrael sem framleiddar eru á hernumdu svæðunum þar í landi. Af tilefninu tefla þeir fram óðamála iðnaðarráðherra og forsætisráðherra veður elg og kastar fram órökstuddum fullyrðingum um að samþykktin hafi stefnt miklum viðskiptum í stórfellda hættu. Björn Bjarnason er hræddur eins og venjulega, Jón Ólafsson, flokksbróðir hans er hræddur um vatnssölu sína í New York og blaðafulltrúi Æslander er hræddur vegna tölvupósta sem hann segir að sér hafi borist vegna málsins. Og í sömu andrá og þetta er skrifað heyrist í fréttum Ríkisútvarpsins að bankastjóri Arionbanka hafi í óttakasti skrifað bréf til forsætisráðherra og borgarstjóra og bent á að gyðingum sem ætla að byggja lúxushótel við Reykjavíkurhöfn kynni að mislíka samþykkt borgarinnar. Atlaga gúbba viðskiptalífsins og stjórnarsinna gegn tillögu borgarstjórnar birtist í hræðsluflogum, ætluðum til þess að skapa ótta og vantrúa fólks á borgarstjórnarflokkunum sem svo vill til að eru andstöðuflokkar stjórnarinnar í landsmálum.

Það má með sanni segja að það hafi verið flumbrugangur af borgarstjórn að samþykkja umrædda tillögu eins og hún var lögð fram. Það hafa forráðamenn borgarinnar viðurkennt. Þess vegna ætla þeir að draga hana til baka og endursemja hana, ef orð þeirra eru rétt skilin, því meiningin var rétt og góðra gjalda verð; að sneiða hjá viðskiptum við þá sem daglega brjóta mannréttindi. Það er að vísu býsna mikið í lagt því að fjölmörg einkafyrirtæki í viðskiptalöndum okkar hafa leyfi stjórnvalda til þess að níðast á verkafólki með fjölbreytilegum hætti. En þetta er þó eitt skref í rétta átt, liður í mannréttindabaráttu.

Og þá er komið að gjaldinu; hvað þarf að borga fyrir að standa með þeim sem minna mega sín gegn þeim sem halda sig eiga heiminn; hvað þarf að greiða fyrir að vera á öndverðri skoðun við ráðandi öfl; hvað ertu reiðubúinn að leggja á þig fyrir sannfæringu þína; hvað ertu reiðubúinn að gera til þess að standa með sjálfum þér?

Af viðbrögðum þeirra sem að framan eru taldir er ljóst að þeir telja ekki að fólk eigi að standa við sannfæringu sína ef það kann að kostar óþægindi. Þó að margur hafi vitað af þeim er gagnlegt að sjá þeim bregða fyrir í dagsljósinu af og til. En það er aumkunarvert að hlusta á málflutning þeirra.