Ístruflanir
Nú er afi ær, og
andskotast á Rauð
úti í nepju og nauð
að ná í sætabrauð.
Nokkrum sortum nær og
næsta víst ég tel
fer þó fráleitt vel,
frýs í hel.
Amma, barin blá,
bíður ómegð hjá,
krílin kveisur hrjá,
krummi hlær á skjá.
Heim þá fákinn fær og
frosinn bónda sinn,
fokinn farmurinn,
framliðinn.
Ömmu í ekkjustandi
aumrar bíður smán
döpur, leið og down
dólgar rukka lán.
Eykst nú víl og vandi,
vesen, baks og streð,
tapast gæfa og geð,
gat nú skeð.
Sýsli kú og sauð
setur, ásamt Rauð,
og öllum karlsins auð
á uppboð, kennt við nauð.
Raun og rándýr fjandi
reynist útförin
passar peninginn
presturinn.
Ein á Austurvelli
amma slær á pott
hreppir háð og spott
hefur auga vott.
Hás í hárri elli
hrum í prjónasokk
gröm í gapastokk
gargar: fokk!
Hokin hornkerling
hrópar inn á þing:
aum er afskræming
engin leiðrétting!
Gljúp þó gráti kelli
gerist ekki neitt,
öllu er löngu eytt;
afar leitt.
Bjarki Karlsson
(Þetta kvæði verður ásamt fjölmörgum öðrum að finna á hljómplötu, bók og hljóðbók, Helreið afa, sem væntanlegar eru í haust. Þar flytja landsþekktir tónlistarmenn lög við ljóð Bjarka.)
- Nú ertu (endanlega) búinn að missa það, Brynjar - 20/02/2022
- Þegar streðinu lýkur – Guðni Már (og mamma) - 03/01/2022
- Afplánunin - 02/12/2021