Úlfar Þormóðsson 28/04/2016

Heilsubót

Ég hlustaði á viðtal við Ástþór Magnússon, forsetaframbjóðanda í gær en veit svo sem ekki hversu miklu ég á að trúa af því sem ég heyrði. Það greiðist væntanlega úr því síðar. Fyrir þá sem vilja hlýða á það er slóðin þessi: http://www.visir.is/section/MEDIA98&fileid=CLP45077

Reykjavík kvikmynd

En svo sá ég úrdrátt úr viðtali sem tekið var við Gylfa Magnússon hagfræðing og fyrrverandi viðskiptaráðherra og trúði hverju orði sem ég las. Viðtalið var flutt á Morgunvaktinni á Rás 1 í dag, 28.04. 2016. Þar hélt Gylfi því fram að aflandsvæðingin hafi skapað helsjúkt samfélag og segir síðan og er að ræða um Tort-óla- og aflandsvæðinguna:

„Það en nánast sama hvar drepið er niður fæti þá koma í ljós slæm áhrif. Auðvitað hafa menn fyrst og fremst horft á skattahliðina og þá staðreynd að svona félög eru í mjög mörgum tilfellum notuð til að komast hjá skattgreiðslum. Stundum beinlínis ólöglega en stundum með einhverjum flækjum sem standast nú ýtrustu próf lögfræðinnar þótt þau séu ekki siðleg. Það þýðir þá auðvitað bara að þeir sem eru með breiðustu bökin þeir eru þá ekki að borga sinn skerf við að halda samfélaginu uppi. Það er auðvitað afleitt. Þeir sem lenda í því að þurfa að borga, venjulegt launafólk sem getur ekki komið sínum tekjum undan skatti með svona trikkum finna auðvitað fyrir því.“

Gylfi segir að ruðningsáhrif þessa séu mikil. „Þeir sem notfæra sér svona brögð geta haft forskot á aðra og þar með heltast hinir úr lestinni í samkeppninni. Þannig að við getum endað með helsjúkt samfélag sem ég held því miður að sé ekkert fjarri lagi sem lýsing á efnahagslífinu.“

Þótt umræðan um Tort-ólana snúist nú að mestu um einstaklinga og breytilega aðkomu þeirra að feluleiknum, meiri eða minni sekt þeirra eftir því hvort þeir eru í þessu sjálfir, konur þeirra eða venslamenn, þá kann það að verða aukaatriði þegar fram í sækir. Þetta er meira mál en svo að Ólar, Bjarnar og Sigmundar heimsins og aðrar gírugar leikbrúður séu þar upphaf og endir. Feluleikurinn er alþjóðlegt mein, drep, sem þarf að komast fyrir og uppræta. Að því ber að vinna í öllum löndum til heilsubóta fyrir mannkynið.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,965