Hannes: Enga flóttamenn nema við græðum á því. Vill bara ´hæfileika- og dugnaðarfólk´

Einn helsti hugmyndafræðingur Sjálfstæðisflokksins til margra ára, Hannes Hólmsteinn Gissurarson, hefur að gefnu tilefni áréttað skoðun sína á málefnum innflytjenda.

Hannes lýsti fyrir ári  þeirri skoðun sinni, að Íslendingar hafi gert mistök með því að taka ekki við fleiri gyðingum fyrir seinna stríð. „Þetta er mikið hæfileikafólk,“ skrifaði hann og virtist eiga við alla gyðinga.

Hið sama þótti honum gilda um íbúa Hong Kong áður en Kína fékk aftur yfirráð yfir borginni skömmu fyrir aldamót. „Það hefði verið búbót að því dugnaðarfólki,“ sagði hann og virtist eingöngu eiga við þá Kínverja, sem voru búsettir í Hong Kong.

Ennfremur þótti honum óráð að hleypa inn í landið útlendingum sem annaðhvort nenntu ekki að vinna eða væru glæpamenn.

Hið seinna virðist honum þykja eiga við þá sem flýja nú stríðsátök í landi sínu, því að á facebook í dag skrifar Hannes Hólmsteinn: „Nú er misjafn sauður í mörgu fé“ og áréttar að innflytjendastefnan eigi að taka mið af reglunni: „Græðum á gæðum“ og á þá við „gæði“ viðkomandi einstaklinga í nauðum.

Erfitt er að meta, hversu mörgum flóttamönnum og verndarleitendum Íslendingar hefðu tekið við á undanförnum árum, ef hæfileika- og dugnaðarmælikvarðar Hannes hefðu verið hafðir að leiðarljósi. Þeir hefðu þó varla náð yfir til dæmis þann ríkisfangslausa hóp kvenna og barna sem settist að á Akranesi fyrir nokkrum árum.