Úlfar Þormóðsson 05/10/2016

Hanastél

Nú eru miklir umbrotatímar fullir af þverstæðum. Saman hrærist óbærilegur léttleiki og þrúgandi ótti; gleði , sorg og  gróði.

Ari Freyr Skúlason

 

Geir Þorsteinsson, formaður KSÍ, fékk tveggja mánaða laun greidd í bónus fyrir árangur karlalandsliðsins á Evrópumótinu í Frakklandi. Annað starfsfólk KSÍ fékk einn mánuð greiddan í bónus. „Greiðslur starfsmanna, leikmanna og mín eru trúnaðarmál. Ég get ekki staðfest eitt né neitt og sérstaklega ekki mín laun,“ er haft eftir Geir í fjölmiðlum. Áður hafði komið fram að hann hafi ekkert með þetta að gera sjálfur því að hann vék af fundi á meðan verið var að afgreiða bónusinn. Geir er talinn þurfa á þessu að halda því að hann er ekki nema tæplega tveggja miljón króna maður per mánuð auk þess sem hann stóð sig afar vel í höfðingjastúkunni á leikjum liðsins.

Björn Bjarnason, fyrrum menntamálaráðherra sér landráðamenn í hverju horni en kærir þá ekki. Hann er nú í hræðslukasti vegna útlendinga. Í óttaflogi skrifaði hann um þetta hræðilega fólk á bloggsíðu sína í gær, 04.10.´16:

(Mynd: Vísir)

(Mynd: Vísir)

 

„Á sama tíma og nágrannaþjóðir fagna fækkun hælisleitenda fjölgar þeim hér. Fjölgunin á einkum rætur að rekja til komu fólks frá Albaníu og Makedóníu sem á engan lagalegan rétt til að fá hér hæli en er í nokkrar vikur, mánuði og jafnvel ár á opinberu framfæri hér á meðan mál þess velkist í kerfinu… Það er í sjálfu sér frekar nöturlegt að gamalt húsnæði Lögregluskólans skuli notað sem neyðarrými til bráðabirgða fyrir hælisleitendur. Virðist þeirri ráðstöfun tekið sem næsta sjálfsögðum hlut í fréttum í stað þess að leita skýringa á hvers vegna svona er komið í þessum málaflokki þegar unnt er að beita mun öflugri úrræðum en gert er til að draga úr fjölda þeirra sem hingað koma … Sé því hreyft að huga þurfi að hervörnum Íslands eða vopnum fyrir lögreglumenn reka þeir gjarnan upp ramakveim sem mega ekki heyra minnst á að allt sé gert sem lög leyfa til að stemma stigu víð ólöglegri komu fólks hingað. Hér er áhrifamikill hópur sem vill engar ráðstafanir til að verja eða vernda land og þjóð, allt á að standa opið.“

Gamall bær

 

Samfylkingin er langt komin með að leysa húsnæðismál unga fólksins; hún ætlar að greiða vaxtabætur fyrirfram til þeirra sem kaupa sér íbúð í fyrsta sinn ef þeir gerast svo áræðnir að kaupa íbúð sem kostar allt að 20 miljónum króna. Slúðrað hefur verið um að í næstu viku verði gefið loforð um að greiða ellilífeyri fyrirfram, fimm ára summu, til þeirra ungmenna sem þurfa að mublera 20miljón króna heimilin og í síðustu viku fyrir kjördag muni stóra trompið dregið fram úr erminni: Barnabætur fyrir sex (6) börn fyrirfram til þeirra sem flytja í 20 miljón króna íbúðirnar og hálfa þá upphæð sem sárabætur til þeirra sem komir eru úr barneign.

SONY DSC

Og Sigmundur Davíð hafði rétt fyrir sér enn einu sinni: Það gerðist nokkuð sem aldrei hefur gerst áður í 100 ára sögu Framsóknarflokksins. Og það rétt áður en gengið var til kosninga um formann flokksins í Háskólabíói um liðna helgi: þrjár rútur, þéttsetnar af fólki, námu staðar framan við bíóið, og út streymdu Kínverjar sem Sigmundur hafði aldrei séð áður. Þó að óvíst sé hversu margir þeirra tóku þátt í formannskosningunni er hitt öllum ljóst og óafturkræft, að kosningin fór öðru vísi en ætlað var. Allt öðru vísi.

Landsmenn mega búast við miklum tíðindum og undrum allan þennan mánuð.

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,851