trusted online casino malaysia
Ritstjóri Herðubreiðar 03/05/2014

Hallgrímur: Fyrirtækin hámarka gróðann í gjaldmiðli sem bannaður skal almenningi. Ræða á Austurvelli

„Að vera lýðræðissinni er fullt starf. Maður verður að vera það alla daga ársins, öll ár, líka hlaupár, og á bakvakt, á kvöldin og um helgar. Að vera lýðræðissinni er dáldið eins og að vera í björgunarsveit. Björgunarsveitarmenn gera ekki upp á milli slysa.“Hallgrímur

Þannig mæltist Hallgrími Helgasyni rithöfundi á samstöðufundi á Austurvelli laugardaginn 3. maí, þar sem hann var ræðumaður ásamt Katrínu Fjeldsted, Steáni Jóni Hafstein og Svani Kristjánssyni. Þetta var síðasti boðaði samstöðufundurinn, en 2. maí voru forseta alþingis afhentar undirskriftir rúmlega 53 þúsund Íslendinga sem krefjast atkvæðagreiðslu um framhald viðræðna við ESB.

Hallgrímur sagði meðal annars:

„Ég veit ekki hvort er verra, harkan og hraðinn í upphafi málsins, eða hægagangur síðustu vikna. Þessi ríkisstjórn virðist ekki geta gert neitt almennilega. Hún getur ekki einu sinni svikið almennilega. Í staðinn fyrir að stjórnin standi við svik sín og taki þau alla leið höfum við fengið loðmullulegt tal og enn óljósari loforð, sem enn auðveldara er að svíkja síðar meir.

Það er eiginlega bara eitt verra en vera svikinn. Og það er að vera svikinn um svikin.

En samkvæmt síðustu fréttum á þó að keyra málið í gegn, þrátt fyrir mótmæli, þrátt fyrir 53 þúsund undirskriftir, þrátt fyrir kosningaloforðin fyrir síðustu kosningar. Maður verður að geta skipt um skoðun ef forsendur breytast, sagði Illugi menntamálaráðherra. Má það þá ekki gilda fyrir þjóðina líka? Má þjóðin ekki líka skipta um skoðun eins og ráðherrarnir? Hún hefur þegar gert það. Forsendur breyttust og ríkisstjórnin hefur ekki lengur meirihluta landsmanna á bakvið sig. Með óbilgirni hafa þau reytt af sér fylgið og fjaðrirnar og nú vill fólk fá að kjósa. Ef ekki til alþingis þá allavega um þetta mál. En nei. Pólitískur ómöguleiki heitir það þá.

En var ekki sama staða uppi á liðnu kjörtímabili? Undirskriftir knúðu fram þjóðaratkvæði og fólkið kaus gegn stefnu ríkisstjórnar. Hvar var ómöguleikinn þá? Og hvað gerði sú stjórn? Hún fór að vilja fólksins og breytti um stefnu. Hverjir voru þá fremstir í flokki að knýja fram þjóðaratkvæði? Þeir sömu og segja nú að 53 þúsund undirskriftir breyti engu.

Maður getur ekki verið lýðræðissinni stundum og stundum ekki.“

Ræða Hallgríms í heild er hér.

Flokkun : Efst á baugi
2,168