Gott er að sjá þig granni minn
Mikið er gott að sjá þig granni minn,
gæskuna hefurðu bróðir – það ég finn.
Einstaklings-einverukenndin af mér skín – einsemdin er fín.
Finnum við brátt í framvindunni ráð
um félag við menn og þá heildina – ef vel er gáð?
Á ég hér heima án þess mér finnist það – segi og skrifa´ á blað.
Firring er tískunnar tík,
treður hún faraldsslóð.
Ofurlíf engum til góðs,
afskræmir hugarfylgsn.
Dofnar þá draumsýn manns
um dáð – að skýra skörðótt líf.
Flýðu nú rök um ráðleysi og gauf,
reikna þér græna skóga og gullin lauf.
Þekktirðu veruleika’ og vanda hans – vanmátt sérhvers manns.
Gerir þér náttstað náðarsólin skær,
nálægð þú merkir við alheim sem tifar, slær.
Hjartað það fagnar; felur nú engin sár – falla gleðitár.
Egill Ólafsson (ort á nýársdag 2017)
- Innan við múrvegginn - 15/01/2021
- Fjárhúsið að sumri til og fleiri þankar - 29/12/2020
- Gamall húsgangur - 24/12/2020