Úlfar Þormóðsson 26/10/2016

Gleymska

Sjálfstæðismenn eru örvæntingarfullir. Mannfæðin er slík hjá flokknum að þeir neyðast til að senda Guðlaug Þór Þórðarson, alþingismann til þess að kynna stefnu flokksins í útvarpi, sjónvarpi og blöðum.

Draugur

Það er alkunna að gleymskan er fylgifiskur örvæntingarinnar. Þannig hélt Guðlaugur Þór því fram í kosningaspjalli í Vísi (26.10.´16) að orðspor Sjálfstæðisflokksins hafi ekki beðið hnekki á kjörtímabilinu. Það hafði fennt yfir Panamaskjölin í huga hans, afglöp og ósannindi Hönnu Birnu, eyðileggingu Kristjáns Þórs Júlíussonar á heilbrigðiskerfinu svo fátt eitt sé nefnt. Nema. Já, nema að hann muni eftir þessu en telji þetta ekki vera ámælisvert á nokkurn hátt.

Og áfram dregur úr fylginu. Þess vegna  eru frammámenn flokksins farnir að dreifa því að Viðreisnarfólkið muni koma aftur heim í Sjálfstæðisflokkinn áður en næsta kjörtímabil verður hálfnað og leggja svo Viðreisn niður.

Framsóknarflokkurinn er líka í vanda. Þar keypti nýi formaðurinn sér frið fyrir Sigmundi Davíð Gunnlaugssyni með því að hefja á loft afstyrmishugmynd hans um nýjan Landspítala á öðrum stað en loks er byrjað að byggja á. Í gleði sinni yfir þessu er Sigmundur Davíð risinn úr dauðarotinu eftir formannsslaginn og gefur út stórkallalegar yfirlýsingar að vanda. Í netmiðlinum Eyjunni, sem síðustu daga er orðinn opinbert málgagn Framsóknarflokksins, sagði hann (26.10.´16): Þetta lið („hrægammarnir“) gefst ekki auðveldlega upp … en það geri ég ekki heldur. Enn á ný láta hrægammarnir í sér heyra.

Og sannast enn að oft sést það verst sem augum er næst. Því man hann ekki lengur hverjir eru „hrægammar.“ Fylgifiskur ofsagleði er gleymska.

Spá

Mér hefur ekki verið lagið að spá fyrir um úrslit kosninga. Eiginlega er ég afleitur spámaður og veit hvers vegna. Ég gleymi því eitt andartak eða tvö og segi svo fyrir um úrslit kosninganna:

Sjálfstæðisflokkur  22% + Vinstri grænir 18% + -Píratar 17% – + Framsóknarflokkur 11 + – Viðreisn 9,5% Samfylking 8,5 % + – Björt framríð 5,5 % + Alþýðufylkingin, Flokkur fólksins og allt þetta fína annað 8,5%

Gleymið samt ekki að kjósa þó að þetta liggi ljóst fyrir!

Úlfar Þormóðsson
Latest posts by Úlfar Þormóðsson (see all)
Flokkun : Efst á baugi
0,827