trusted online casino malaysia
Úlfar Þormóðsson 10/05/2018

Glamur

Fjöldreifing á Morgunblaðinu stendur yfir þessa dagana. Það dregur að kosningum og eigendum blaðsins (ma. Eyþóri Arnalds) ber skylda til að opna frambjóðendum sínum (ma. Eyþóri Arnalds) leið að kjósendum. Þetta er skiljanlegt út frá hagsmunum þeirra sem að málinu koma.

Í blaði dagsins (10.05.2018) kennir margra grasa. Þar er ma. grein eftir frambjóðandann, eiganda blaðsins, önnur eftir ritara flokksins og margt og mikið meira eins og eðlilegt má telja í “blaði allra landsmanna”.

Þar er og leiðari.

Ómerktur leiðari. Að vanda. Í honum er fjallað um riftun Trumps á kjarnorkuvopnasamningi milli Írans og annarra þjóða heims, samningi þess efnis að Íranir muni ekki framleiða kjarnorkuvopn. Þetta er vondur samningur, segir Trump. Þetta er “óneitanlega götóttur og gallaður” samningur, segir leiðarahöfundur Morgunblaðsins.

Og það felst meira í leiðaraskrifunum. Þau eru gleðilæti, hylling á forseta Bandaríkjanna, Trump, fyrir að svíkja gerðan samning og stefna öllu í bál og brand. Um veröld víða.

Þetta er óneitanlega merkilegur leiðari. Ekki síst vegna þess hversu ómerkilegur hann er. Og líka vegna þess að hann ber í sér stríðsást.

En.

Hann gæti líka verið skrifaður í angist djúphyggjumanns, sem úir og grúir af í Sjálfstæðisflokknum, dauðhræddum hugmyndafræðingi, sem sér lengra en nefið nær og áttar sig á því, að með framferði sínu gæti hetjan Trump verið að eyðileggja Nató, sjálft varðbergið. Er jafnvel búinn að því. Og hvað má þá til varnar verða, hlýtur hann að spyrja sig, djúphyggjumaðurinn. Ekki fylgjum við Evrópulöndunum að málum, ESB, og lendum jafnvel í deilum við Bandaríkin?

Nei, aldrei skal það verða, svarar hann sjálfum sér og ákveður að fylgja Trump. Frá frysta degi. Hann sér um sína, hann Trump.

Það skal tekið fram fyrir óvana lesendur að þessi útlegging á skrifum feimna leiðarahöfundarins, nafnlausa djúphyggjumannsins, er byggð á ágiskunum. Getgátum.

Og lýkur svo skrifunum með því að skorað er á lesarann að opna frí-Moggann sinn, lesa leiðarann og geta sér svo til um, hvers vegna hann var skrifaður. Leiðarinn. Og fyrir hvern.

Latest posts by Úlfar Þormóðsson (see all)
Flokkun : Efst á baugi
1,300