Glæta

 

Vorið kemur á morgun, 20.03. samkvæmt almanakinu og vorleysingar eru hafnar í pólitíkinni. Samkvæmt nýjustu skoðunarkönnun MMR er augljós klofningur í Sjálfstæðisflokknum, hrun í Framsókn þrátt fyrir síendurteknar vinsældarveiðar, fylgi Bjartrar framtíðar minnkar frá fyrri mælingum, fylgi Samfylkingar og Vinstri grænna stendur í stað en Píratar vaxa, mælast með 23,9% stuðning, mest allra stjórnmálaflokka.

Birgir Guðmundsson, stjórnmálafræðingur segir á Dv.is að mikið fylgi Pírata sé ákall eftir nýrri umræðu í íslenskum stjórnmálum og að „uppsveifla þeirra“ geti stafað af óánægju með „fjórflokkinn“. Hann telur augljóst að Píratar nái mun betur til fólks með sínum aðferðum og að málefni sem þeir berjist fyrir séu „heit í þjóðfélagsumræðunni í dag, það er að segja gegnsæi í stjórnmálum, mannréttindi og fleira.“

Einstaka pólitíkusar hafa komið óorði á stjórnmálin undangengin ár. Það hefur færst yfir á alla pólitíkusa og enginn undanskilinn í umræðunni. Viðkvæðið er kunnuglegt: „Það er sama rassgatið undir þeim öllum“. Sveinn Hannesson, virkur í athugasemdum (hvað svo sem það merkir), hefur þetta um málin að segja á Dv. is: „Það er engin þörf á að kynna stefnur og vinnuaðferðir fjórflokksins. Stefnur þeirra og vinnubrögð eru 4 orð. LYGI, FALS, LÝÐSKRUM og SVIK.“ Þetta blasir svona við honum. Og mörgum öðrum. Eigi að síður er vitað að þetta er ekki rétt lýsing á vinnubrögðum allra flokka þó að það sé haft við um þá alla jafnt.

Ein ástæða fyrir miklu fylgi Pírata gæti verið að þeim er orðhengisháttur ekki jafn tamur og mörgum öðrum, en hann verður oftar en ekki til þess að meining erindisins týnist. Þess í stað nota þeir talmál sem stærstur hluti landsmanna skilur. Önnur ástæða gæti og verið að Píratar eru fundvísir á mál sem koma almenningi við, málefni sem snerta fólk beint og óbeint.

Það má lengi ala vonina. Og enn skal hún sett á: Að stjórnmálamenn leggi sig fram við að hlusta á fólkið í landinu, tali af hreinskilni eftir að hafa íhugað hvort þeir hafi eitthvað til mála að leggja og standi við orð sín. Takist þeim þetta batnar þjóðlífið.