Ritstjóri Herðubreiðar 02/04/2014

Gísla Marteini bent á staðreyndir: Í Kópavogi er gott að gista og gaman að leita að ást á pöbbnum

Fjölmargir hafa komið Kópavogi til varnar í hápólitískri deilu sem sprottin er af ummælum Gísla Marteins Baldurssonar, um að hann bæði til guðs „að einhver túristi lendi ekki í því að vera á einhverju glötuðu hóteli í Kópavogi, fyrirgefið þið. Vegna þess að hann verður bara brenndur af því. Það er ekki gaman þar.“Gísli Marteinn

Langmesta athygli hefur vakið grein Sigurjóns Jónssonar, framsóknarmanns í Kópavogi, þar sem hann rekur ummælin beint ofan í Gísla Martein með því að benda á Smáralind, skíðasvæðið í Bláfjöllum, álfana við Álfhólsveg og Hamraborgina sem nokkrar af fjölmörgum perlum Kópavogs.

Katrín Júlíusdóttir, alþingismaður og innfæddur Kópavogsbúi, minnir Gísla á indælt kaffihús í Hamraborginni og indverska veitingastaðinn Bombay Bazaar, þar sem fáist frábær matur. Herðubreið getur staðfest þau sannindi.

Aðrir eru vísindalegri og vitna í ferðamennina sjálfa, svo sem Freyr Eyjólfsson sem kveðst hafa fundð þessi ummæli á ferðamannavefnum Tripadvisor:

„When we were in Kópavogur, we did a lot of sightseeing and were absolutely exhausted from walking. We found a surprisingly calm place in the center of Kópavogur, Hamraborgin, for resting at cafés and perhaps reading books. Don´t forget Engihjalli and Smiðjuhverfi! Lots of places to sit and ponder the meaning of your life, like Players and Katalína.“

Herðubreið er ekki kunnugt um tengsl Freys við Kópavog.

Loks ber að nefna hagyrðingana, sem rennur blóðið til skyldunnar, svo sem Huga Ólafsson embættismann í umhverfisráðuneytinu:

Túristar finna ekki kostinn fyrsta

í firði eða vík eða í neinum höfnum,

en í Kópavogi er gott að gista

og gaman að leita að ást á pöbbnum.

Flokkun : Efst á baugi
0,843